Elm və Təhsil Nazirliyinin İnformasiya Texnologiyaları İnstitutunda rəqəmsal dövlət quruculuğu problemlərinin elmi-nəzəri əsaslarına dair tədqiqatların nəticələrini əks etdirən “Rəqəmsal dövlət problemləri: məqalələrin xülasələri” adlı ekspres-informasiya çapdan çıxıb.
AZƏRTAC xəbər verir ki, yeni nəşr institutun əməkdaşları tərəfindən rəqəmsal dövlət quruculuğunun müxtəlif istiqamətləri üzrə aparılmış çoxşaxəli elmi tədqiqatların mühüm nəticələrini özündə əks etdirir. Kitabçada son 20 ildə nüfuzlu beynəlxalq və ölkə səviyyəli jurnallarda, konfrans toplularında dərc edilmiş 154 elmi əsərin xülasəsi yer alıb.
Ekspress-informasiyada rəqəmsal dövlətin sintezi və analizi üçün süni intellekt texnologiyalarının tətbiqi, səmərəli idarəetmə mexanizmləri və modelləri, vətəndaş məmnuniyyətinin və informasiya təhlükəsizliyinin təmin olunması, rəqəmsal demoqrafiya infrastrukturunun formalaşması kimi aktual mövzulara həsr olunmuş elmi əsərlər haqqında məlumat verilir.
Texnika elmləri üzrə fəlsəfə doktoru, dosent Fərhad Yusifovun elmi redaktorluğu ilə hazırlanmış bu toplu rəqəmsal dövlət problemləri sahəsində fəaliyyət göstərən tədqiqatçılar, mütəxəssislər, ali məktəb müəllimləri və tələbələri üçün dəyərli biblioqrafik mənbədir. Kitabça, həmçinin ölkəmizdə rəqəmsal dövlət sahəsində elmi biliklərin sistemləşdirilməsi və təbliği baxımından mühüm əhəmiyyət kəsb edir.
