ETN İnformasiya Texnologiyaları İnstitutunun Elmi şurasının növbəti iclasında institutun baş mühəndisi, şöbə müdiri Şakir Mehdiyev rəhbərlik etdiyi struktur bölmənin cari il üzrə fəaliyyət istiqamətləri barədə məlumat verib.
Əvvəlcə şöbənin elmi-nəzəri fəaliyyəti ilə bağlı görüləcək işləri nəzərə çatdıran Ş.Mehdiyev cari ildə İndustry 4.0 platformasında kiberfiziki sistemlərin intellektual analizi və sintezi problemləri üzrə tədqiqatların davam etdiriləcəyini qeyd edib. Onun sözlərinə görə, bu problem çərçivəsində “Kiberfiziki sistemlərin dayanıqlığının təmin edilməsi üçün metod və alqoritmlərin işlənməsi” mövzusu üzrə kiber-fiziki sistemlərdə enerjinin tükənməsi ilə bağlı kiber hücumların tədqiqi və onlarla mübarizə üsulları, proqnozlaşdırıcı (prediktiv süni intellekt) texnologiyalar əsasında kiberfiziki sistemlərinin dayanıqlı və səmərəli işləməsinin təmin olunması üsulların tədqiqi məsələləri və digər istiqamətlərdə tədqiqatlar aparılacaq.
Şöbə rəhbəri həmçinin “İnklüziv cəmiyyətin inkişafında kiberfiziki sistem texnologiyalarının rolu və tədqiqi” mövzusu üzrə aparılması nəzərdə tutulan tədqiqatlardan bəhs edərək, məhdud imkanları olan insanların mobilliyini və ünsiyyətini yaxşılaşdırmaq üçün ağıllı sistemlərin tətbiqi və adaptiv texnologiyaların, ağıllı qurğuların və robotlaşdırılmış sistemlərin sosial və iqtisadi inkişafa təsiri məsələlərinin tədqiq olunacağını vurğulayıb.
Sonra məruzəçi cari il ərzində şöbədə elmi-pedaqoji və elmi-təşkilati fəaliyyət, elmi-praktiki nəticələrin KİV-də təbliği, beynəlxalq və respublika səviyyəli jurnallarda elmi məqalələrin nəşri, ölkədaxili və beynəlxalq tədbirlərdə iştirak çərçivəsində görüləcək işlər haqqında məlumat verib.
Sonda AMEA-nın vitse-prezidenti, institutun baş direktoru, akademik Rasim Əliquliyev inklüziv cəmiyyətin inkişafında kiberfiziki sistem texnologiyalarının böyük rola malik olduğunu qeyd edərək, inklüziv cəmiyyətin formalaşmasında rast gəlinən problemlərin, inklüzivliyi təmin edən süni intellekt texnologiyaların və bu istiqamətdə dövlət siyasətinin dərindən araşdırılması və təkliflərin işlənilməsinin vacibliyindən danışıb. Baş direktor şöbədə aparılan tədqiqatların genişləndirilməsi, əməkdaşların elmi-nəzəri fəaliyyətinin daha da gücləndirilməsi ilə bağlı tapşırıqlar verib.
© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.
