BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) Azərbaycan elminin qarşısına ölkəmizdə yaşıl iqtisadiyyatın, yaşıl cəmiyyətin formalaşdırılması, ekoloji vəziyyətin yaxşılaşdırılması, o cümlədən alternativ enerji mənbələrindən istifadənin genişləndirilməsi ilə bağlı mühüm vəzifələr qoyur.
AMEA-nın vitse-prezidenti, ETN İnformasiya Texnologiyaları İnstitutunun baş direktoru, akademik Rasim Əliquliyev AZƏRTAC-a açıqlamasında belə deyib. COP29-un Azərbaycan elminin qarşısına qoyduğu problemlər və vəzifələrə, yeni prioritetlərə diqqət çəkən akademik Rasim Əliquliyev rəqəmsal texnologiyaların yaşıl dünya üçün yaratdığı neqativ təsirlərin minimallaşdırılmasında, eyni zamanda mürəkkəb ekoloji problemlərin həllində süni intellekt texnologiyalarının tətbiqinin çox böyük perspektivlər vəd etdiyini söyləyib.
Akademik qlobal iqlim dəyişmələri problemlərinin həllində alim və mütəxəssislərin fəal iştirakının vacibliyinə toxunub. Bildirib ki, sağlam ətraf mühiti formalaşdırmaq məqsədilə rəqəmsal texnologiyalardan istifadə əsasında müxtəlif yaşıl problemlərin həllinə dəstək verilməlidir. Təbiətdə gedən prosesləri təhlil etmək, iqlim dəyişmələri ilə bağlı ifrat böyük məlumatları vaxtlı-vaxtında toplamaq, intellektual emal etmək, yüksək keyfiyyətli, analitik və proqnoz üçün əhəmiyyətli bilikləri əldə etmək son dərəcə vacibdir.
“Cənab Prezident İlham Əliyevin yaşıl texnologiyaların inkişafı, yaşıl cəmiyyətin və yaşıl iqtisadiyyatın formalaşdırılması ilə bağlı çağırışlarına elmi dəstək verməliyik” – deyən AMEA-nın vitse-prezidenti, IV Sənaye İnqilabının gətirdiyi yeniliklər kontekstində ölkəmizdə yeni enerji, nəqliyyat və su təchizatı infrastrukturlarının qurulması, eləcə də digər kritik sistemlərin fəaliyyətinin intellektuallaşdırılması, kibertəhlükəsizliyinin təmin olunması istiqamətində konkret elmi innovativ layihələrin işlənilməsinin nəzərdə tutuluduğunu vurğulayıb.
