2021-ci ildə institutda proqram məhsullarının təhlükəsizliyinin qiymətləndirilməsi zərərli proqram təminatının statik və dinamik analizi, pilotsuz uçuş aparatlarının aşkarlanması üsulları, kiber-fiziki sistemlərdə kriptoqrafik autentifikasiya protokolları üzrə araşdırmalar aparılıb.
AMEA İnformasiya Texnologiyaları İnstitutunun Elmi şurasının növbəti onlayn iclasında 2 saylı şöbənin 2021-ci il üzrə hesabatı müzakirə olundu. Hesabatı təqdim edən institutun baş elmi işçisi, texnika üzrə fəlsəfə doktoru, dosent Ramiz Şıxəliyev şöbədə cari il ərzində aparılan elmi tədqiqatlar, əməkdaşların respublika və beynəlxalq konfranslarda iştirakı, tanınmış elmi jurnallarda məqalələrin nəşri və s. ilə bağlı yerinə yetirilmiş işlər barədə ətraflı məlumat verdi. O, cari ildə informasiya təhlükəsizliyi, Industry 4.0 platformasında kiber-fiziki sistemlərin və bulud sistemlərinin analizi və sintezi problemləri istiqamətlərində müxtəlif mövzular üzrə elmi tədqiqatların aparıldığını bildirdi.
R.Şıxəliyev e-dövlətin informasiya təhlükəsizliyinin idarə edilməsi problemlərinin tədqiq olunduğunu, bulud sistemlərində və kiber-fiziki sistemlərdə informasiya təhlükəsizliyinin təmin edilməsi metodlarının,kompüter şəbəkələrinin intellektual monitorinqi texnologiyalarının və İnternet mühitində kompüter insidentlərinin intellektual analizi metodlarının işləndiyini qeyd etdi. Həmçinin proqram məhsullarının təhlükəsizliyinin qiymətləndirilməsi zərərli proqram təminatının statik və dinamik analizi, pilotsuz uçuş aparatlarının aşkarlanması üsulları, kiber-fiziki sistemlərdə kriptoqrafik autentifikasiya protokolları üzrə araşdırmaların davam etdirildiyini diqqətə çatdırdı.
Şöbənin elmi-tədqiqat fəaliyyətinin nəticələri barədə danışan məruzəçi 30-dan çox məqalənin çap edildiyini və elmi konfranslarda müzakirə olunduğunu qeyd etdi. “Web of Science” və “Scopus” elmi bazalarına daxil olan məqalələr barədə ətraflı məlumat verdi.
R.Şıxəliyev şöbənin elmi-innovasiya, elmi-ekspertiza, elmi-təşkilati fəaliyyəti, elmi-praktiki nəticələrin KİV-də təbliği ilə bağlı görülmüş işlərdən söz açdı. Beynəlxalq elmi əməkdaşlıq çərçivəsində Türkiyə, Ukrayna, Qazaxıstan, Polşa, İsveç və Cənubi Koreyanın bir sıra aparıcı elmi tədqiqat qurumları ilə sıx əlaqələrin davam etdirildiyini bildirdi.
Sonra çıxış edən AMEA-nın vitse-prezidenti, İnstitutun baş direktoru, akademik Rasim Əliquliyev çıxış edərək, şöbənin elmi fəaliyyətini yüksək qiymətləndirdiyini bildirdi. Şöbədə xüsusilə gənc alimlərin aktual problemlər üzrə apardıqları elmi tədqiqatların daha da dərinləşdirilməsinin zəruriliyini qeyd etdi. Alim informasiya təhlükəsizliyi problemləri ilə bağlı tədqiqatların xüsusi aktuallıq kəsb edən məsələlərdən olduğunu qeyd edərək, şöbədə bu istiqamətdə aparılan elmi araşdırmaların daha da dərinləşdirilməsini tövsiyə etdi.
Sonda hesabatla bağlı fikir mübadiləsi aparıldı, suallar cavablandırıldı.
Elmi şuranın qərarı ilə şöbənin fəaliyyəti qənaətbəxş hesab edildi.
© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.
