AMEA İnformasiya Texnologiyaları İnstitutunda Tədris-İnnovasiya Mərkəzinin növbəti elmi seminarı keçirildi. İnstitutun dissertantı Bahar İsmayılova “İntellektual oyunlar: müasir vəziyyət, problemlər və perspektivlər” adlı məruzəni təqdim edərək intellektual oyunların təşkilinin əsas psixoloji və pedaqoji aspektlərindən söz açdı. Bildirdi ki, buraya oyuna cəlb edilmədə məcburiyyətin olmaması, əlçatanlıq, aydınlıq, əyanilik və emosionallıq kimi amillər daxildir.
Məruzəçi tədrisyönümlü oyunların yaranması və təkamülü barədə də söhbət açdı. Qeyd etdi ki, “The Oregon Trail” adlı ilk tədrisyönümlü kompüter oyunu 1971-ci ildə meydana gəlmişdir. Hazırda azyaşlı uşaqların oxu, danışıq savadı və sadə riyazi bacarıqlarının formalaşması üçün minlərlə oyun mövcuddur.
O, kompüter oyunlarının janr, oyunçuların sayı və qarşılıqlı fəaliyyəti, məzmun və platformaya görə təsnif olunduğunu dedi. Həmçinin “Civilization” seriyası, “Europa Universalis”, “Railroad Tycoon”, “Rails Across America” və “PlaceSpotting” kimi tədris prosesində uğurla tətbiq olunan oyun nümunələri haqqında məlumat verdi, bu istiqamətdə aparılan elmi tədqiqatlardan söz açdı.
B.İsmayılova rəqəmsal oyunlar və motivasiya, tədrisyönümlü oyunlar üzrə beynəlxalq konfranslar, krossvord həlli üzrə dünya çempionatları haqqında məlumatları da diqqətə çatdırdı.
Sonda isə intellektual oyunların tədrisdə tətbiqi ilə bağlı konkret təkliflər səsləndirdi.
Məruzə ətrafında fikir mübadiləsi aparıldı, irad, rəy və təkliflər səsləndirildi.
© Bütün hüquqlar qorunur. Xəbərlərdən istifadə edərkən www.ict.az saytına istinad zəruridir.
