Dünya iqtisadiyyatında müşahidə olunan zəiflik və qiymətlərin düşməsi serverlər bazarına da təsirsiz ötüşməmiş, son iki ildə onların satış həcmi azalmışdır. “IC Insights” şirkətinin analitikləri xəbər verirlər ki, 2014-cü ildən başlayaraq bu bazarda bərpa müşahidə olunacaq: cari illə müqayisədə server avadanlığının satışlarından əldə olunan gəlir təxminən 3% artaraq, 53 milyard dollardan 54,6 milyarda çatacaq.
dailycomm.ru saytının məlumatına görə, növbəti iki ildə isə daha çox irəliləyiş gözlənilir - satışlar 56,7 və ya 58,7 milyard dollara qədər arta bilər. Sonra, yenidən iqtisadi geriləmə ilə əlaqədar olaraq, göstəricilər 57,5 milyarda kimi enəcək. Bütovlükdə 2012-ci ildən 2017-ci ilə qədər olan dövrdə server (CAGR) satışlarının orta illik artım sürətinin səviyyəsi yalnız 1,5% təşkil edəcək.
Server sistemlərinin təchizatına gəlincə, bu il onların həcmi ötən illə müqayisədə 8,7 milyon ədəddən 9 milyona, 2014-cü ildə isə 9,8 milyona çatacaq. Tədqiqatda göstərilən qrafikə əsasən, daha üç il sonra bu göstəricinin 11,8 milyon olacağı gözlənilir.
