ETN İnformasiya Texnologiyaları İnstitutunun Elmi şurasının iclasında şöbə müdiri, texnika üzrə fəlsəfə doktoru, dosent Bikəs Ağayev rəhbərlik etdiyi struktur bölmənin 2025-ci il üzrə yarımillik hesabatını təqdim edib.
Öncə şöbənin elmi-nəzəri fəaliyyəti haqqında məlumat verən B.Ağayev bildirib ki, 6 ay ərzində şöbədə rəqəmsal tranformasiyalar və informasiya cəmiyyətinin formalaşmasının elmi-nəzəri əsaslarının araşdırılması və inkişaf etdirilməsi istiqamətində rəqəmsal dövlətin formalaşması və intellektuallaşdırılması problemləri üzrə bir sıra mövzularda tədqiqatlar aparılıb. Sənaye 4.0 platformasında İKT-nin tətbiqi ilə ətraf mühitin mühafizəsi problemlərinin həlli istiqamətində beynəlxalq təşkilatların elektron tullantıların idarəçiliyi təcrübəsinin müqayisəli analizi və Azərbaycanda tətbiqi üçün təkliflərin işlənməsi, eləcə də akustik küyün, o cümlədən aşağı və infrasəs tezlik spektrli intensiv akustik küyün elmi tədqiqat müəssisəsinin əməkdaşlarının fəaliyyətinə ziyanlı təsirinin monitorinqi ilə bağlı tədqiqatlar aparılıb, araşdırma nəticələri ilə nüfuzlu beynəlxalq konfranslarda məruzə edilib.
Şöbə rəhbəri qeyd etmişdir ki, “Sənaye 4.0 platformasında kiberfiziki sistemlərin intellektual analizi və sintezi problemləri” üzrə neft-qaz kompleksinin mövcud texnoloji problemlərinin İKT platformasında innovativ həlli yolları ilə bağlı tədqiqatların aparılmış, eyni zamanda neft-qaz komlekslərinin ətraf mühitə və iqlim dəyişmələrinə təsir xüsusiyyətləri araşdırılmışdır. Tədqiqat nəticələrini əks etdirən iki məqalə hazırlanmış və xarici ölkələrin nüfuzlu beynəlxalq elmi bazalarda indeksləşən jurnallarında nəşr edilmişdir.
Sonra B.Ağayev 6 ay ərzində respublika və digər ölkələrin Ali Attestasiya Komissiyasının siyahısına daxil olan jurnallarda nəşr olunan məqalə və tezisləri diqqətə çatdırıb.
O, şöbə əməkdaşlarının elmi-innovasiya, elmi-pedaqoji, elmi-təşkilati fəaliyyəti, elmi-texniki konfranslarda, seminarlarda və digər elmi tədbirlərdə, qrant layihələrdə iştirakı barədə də məlumat verib.
Daha sonra hesabata dair ətraflı fikir mübadiləsi aparılıb, suallar cavablandırılıb.
AMEA-nın vitse-prezidenti, institutun baş direktoru, akademik Rasim Əliquliyev çıxış edərək şöbənin yarımillik hesabatı üzrə bir sıra təklif və tövsiyələrini səsləndirib. O, şöbə əməkdaşlarının elmi-nəzəri fəaliyyətinin daha da gücləndirilməsi ilə bağlı tapşırıqlar verib, araşdırılan problemlərin digər aspektləri üzrə tədqiqat dairəsinin, eləcə də xarici olkələrin elmi tədqiqat mərkəzləri ilə əlaqələrin genişləndirilməsi zəruriliyini vurğulayıb.
© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.
