ETN İnformasiya Texnologiyaları İnstitutunun Elmi şurasının iclasında Big Data analitikası və Data Mining problemləri üzrə tədqiqatlar aparan şöbənin 2025-ci ilin birinci yarısı üzrə hesabatı müzakirə olunub.
Şöbə müdiri, AMEA-nın müxbir üzvü Ramiz Alıquliyev “Klasterləşmənin elmi-nəzəri əsaslarının inkişaf etdirilməsi üçün yeni model və alqoritmlərin işlənməsi” mövzusu üzrə böyük verilənlərin klasterləşdirilməsi üçün optimallaşdırma modeli və onun həlli, eləcə də ellipsoidal klasterləşdirmə üçün optimallaşdırma modeli və onun həlli üçün alqoritmlərin işlənilməsi istiqamətində tədqiqatların aparıldığını diqqətə çatdırıb.
O, Big Data analitikası və Data Mining problemləri üzrə “E-idarəetmənin səmərəliliyinin artırılması üçün süni intellekt metodlarının işlənməsi”, “Böyük həcmli məlumatlarda anomaliyaların aşkarlanması üçün alqoritmlərin işlənməsi”, “Plagiatlığın aşkarlanması üçün mətnlərin intellektual analizi metodlarının işlənməsi”, “Böyük həcmli məlumatların analizi üçün iterativ klasterləşdirmə metodları” və digər mövzular üzrə tədqiqatların davam etdirildiyini diqqətə çatdırıb. Həmçinin böyük məlumatların analizi üçün dərin təlim modelləri və metodlarının işlənməsi, iyerarxiyaya əsaslanan klasterləşdirmə alqoritmlərinin böyük verilənlərə tətbiqi, elektron ticarətdə fırıldaqçılığın aşkarlanması üçün metod və alqoritmlərin işlənməsi istiqamətləri üzrə aparılan tədqiqatlar haqqında məlumat verib.
Alim Industry 4.0 platformasında kiberfiziki sistemlərin intellektual analizi və sintezi problemləri üzrə yerinə yetirilmiş tədqiqat işlərini qeyd edərək, “Xətti-kvadratik optimal idarəetmə məsələsi üçün requlyatorların qurulmasında qərarlaşmış rejimə keçid nöqtəsinin təyin edilməsi üsulları” və “Pilotsuz uçuş aparatlarının əvvəlcədən verilmiş trayektoriya üzrə hərəkətinin idarə olunması üsulları” mövzuları üzrə aparılmış tədqiqatların nəticələrini təqdim edib.
R.Alıquliyev cari ilin birinci yarısında rəhbərlik etdiyi şöbədə AR Dövlət Neft Şirkətinin Elm Fondunun və Azərbaycan Elm Fondunun maliyyələşdirdiyi qrant layihələri çərçivəsində yerinə yetirilmiş məsələlər və çap olunmuş məqalə və tezislər barədə də məlumat verib.
Məruzəçi hesabat dövründə Web of Science, Scopus və digər beynəlxalq elmi bazalarda indeksləşən jurnallarda, eləcə də Ali Attestasiya Komissiyası tərəfindən tövsiyə edilən dövri elmi nəşrlərdə 26 məqalənin, o cümlədən respublika və beynəlxalq səviyyəli konfransların materiallarında 7 tezisin çap olunduğunu qeyd edib.
Şöbə müdiri həmçinin Avstraliya Federativ Universiteti, Avstraliyanın Melburn Kral Texnologiya İnstitutu, Türkiyənin Ankara və Dokuz Eylül universitetləri, Böyük Britaniyanın Derbi və Belfast Kraliça universitetləri, eləcə də ABŞ-ın Lamar Universiteti ilə beynəlxalq elmi əməkdaşlıq əlaqələrinin daha da inkişaf etdirilməsi istiqamətində bir sıra tədbirlərin həyata keçirildiyini nəzərə çatdırıb.
Sonra AMEA-nın vitse-prezidenti, institutun baş direktoru, akademik Rasim Əliquliyev müasir dövrdə böyük aktuallıq kəsb edən problemlərdən olan klasterləşmənin elmi-nəzəri əsaslarının inkişaf etdirilməsi ilə bağlı aparılan tədqiqatların əhəmiyyətini qeyd edərək, şöbənin beynəlxalq əməkdaşlığı çərçivəsində tanınmış alimlərlə aparılmış big data analitikası, onun klasterləşdirilməsi problemləri ilə bağlı aparılan tədqiqatların nəticələrinin institutun elmi seminarında təqdim olunmasının əhəmiyyətli olduğunu qeyd edib.
Alim həmçinin gənc tədqiqatçıların elmi fəaliyyətinin daha da gücləndirilməsi, aparılan araşdırmaların nəticələrinin nüfuzlu elmi jurnallarda nəşr olunmasına dair tövsiyələr verib.
Elmi şuranın qərarı ilə şöbənin yarımillik hesabatı qənaətbəxş hesab olunub.
© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.
