AMEA-nın vitse-prezidenti, ETN İnformasiya Texnologiyaları İnstitutunun baş direktoru, akademik Rasim Əliquliyev “Space” kanalının “Düzün sözü” verilişinin qonağı olub. Akademik Rasim Əliquliyev hazırda ölkəmizdə keçirilən COP29-un əhəmiyyəti, bu mötəbər tədbir çərçivəsində baş tutan Liderlər Sammiti, eləcə də inkişaf etməkdə olan kiçik ada dövlətlərinin Sammiti ilə bağlı fikirlərini bölüşüb.
AMEA-nın vitse-prezidenti qlobal tədbirlərin məkanına çevrilmiş ölkəmizdə bu kimi tədbirlərin keçirilməsini sevindirici hal kimi qiymətləndirərək, COP29-a 80-ə yaxın ölkənin dövlət başçılarının qatıldığını vurğulayıb. Akademik R.Əliquliyev sözügedən sammitlərdə qlobal iqlim dəyişmələri problemlərinin, o cümlədən yaşıl enerjinin istehsalının təmin edilməsi, qabaqcıl texnologiyalardan istifadə etməklə karbon emissiyasının çəkisinin azaldılması və s. ilə bağlı müxtəlif dövlətlərin üzərinə düşən vəzifələrlə əlaqədar geniş müzakirələrin aparıldığını diqqətə çatdırıb.
Akademik AR Prezidenti İlham Əliyevin 2 fevral 2021-ci il tarixli Sərəncamı ilə təsdiq edilmiş Azərbaycan 2030: sosial-iqtisadi inkişafa dair Milli Prioritetlərdə “Təmiz ətraf mühit və “yaşıl artım” ölkəsi” prioritetinin reallaşdırılmasının qarşıya məqsəd kimi qoyulduğunu da qeyd edib.
© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.
