Şimali İrlandiyada kibertəhlükəsizlik sektoru böyüyür. Bu səbəbdən qlobal texnologiya şirkəti “Microsoft” kibertəhlükəsizliyin yeni mərkəzi üçün məkan olaraq Şimali İrlandiyanın paytaxtı Belfastı seçib.
Bu layihə çərçivəsində səksən beş yeni iş yeri yaradılacaq, eləcə də İqtisadiyyat Nazirliyi Belfast Şəhər kollecində təlimdən əvvəl təhsili maliyyələşdirmək üçün 800.000 funt sterlinq vəsait ayıracaq. “Microsoft”un Belfastdakı ofislərində artıq 28 nəfər çalışır.
“BBC News” telekanalının Rusiya xidmətinin məlumatına görə, “Şimali İrlandiya İnvest” planlaşdırılan 85 vəzifədən 25-nin yaradılması məqsədi ilə 150.000 funt sterlinq təklif edib. Bununla yanaşı, akademiyanı bitirən bütün tələbələrə şirkətdə işlə təmin olunmaları üçün müsahibə imkanı da veriləcək.
Mütəxəssislər qeyd edirlər ki, 2030-cu ilə qədər Şimali İrlandiya bu sahədə 5000-ə qədər mütəxəssisin çalışdığı kibertəhlükəsizliyin qlobal mərkəzi kimi tanınacaq.
“Microsoft Avropa, Orta Şərq və Afrikadakı ən böyük korporativ müştərilərinə dəstək verəcək və şirkət Şimali İrlandiyada yeni kibertəhlükəsizlik mərkəzini yaratmaqdan məmnundur”, - deyə “Microsoft” şirkətinin nümayəndəsi Darren Dillon bildirib.
© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.
