"Apple" şirkətinin rəhbəri Tim Kuk yeni məhsulların təqdimat mərasimində iPhone-u "istehlakçı məmnunluğuna görə dünyada ən çox sevilən smartfon" adlandırdı. Bu bəyanat səhmdarları o qədər də ruhlandırmadı. Belə ki, iPhone 6 və iPhone 6 Plus məhsullarının elanından dərhal sonra "Apple"in səhmləri 3 faiz artsa da, Watch saatlarının nümayişindən sonra aşağı düşdü.
Sentyabrın 9-na olan nəticələrə görə, "Apple"in səhmləri 97,99 dollar oldu ki, bu da 1 gün əvvəl ilə müqayisədə 0,38% azdır. Ümumilikdə, Kaliforniya nəhənginin bazar kapitallaşması təxminən 30 milyard dollara kimi azaldı.
dailycomm.ru saytından bildiriblər ki, 2014-cü ilin əvvəllərindən "Apple"in qiymətli kağızları ümumilikdə 20% bahalaşmışdı. Həmin dövr üçün S&P 500 indeksi isə yalnız 7,8% yüksəlmişdi.
"Bespoke Investment Group" analitiklərinin sözlərinə görə, "Apple" səhmlərinin cari vəziyyəti səciyyəvi hal hesab oluna bilər: onlar yeni məhsulların işə salınması ərəfəsində bahalaşır, ay boyunca qiymətdən düşür, üç ay sonra isə yenidən artım nümayiş etdirməyə başlayırlar.
© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.
