Azərbaycanda bu günə kimi 21930 domen adı qeydiyyatdan keçib. Onların sayının cari ildə də artacağı gözlənilir
ictnews.az elektron xəbər xidmətinin verdiyi məlumata əsasən, ilin əvvəlindən qeydiyyata alınan domen adlarının sayı 1703, ləğv olunanların sayı 482 olub. Beləliklə, bu ilin əvvəlindən istifadəyə verilən domen adlarının xalis artımı 1221 domen təşkil edib. Son iki ay ərzində qeydə alınan domen adlarının sayı 5,3% olub.
Hazırda Azərbaycanda 20505 .az, 857 .com.az, 182 .edu.az, 116 .org.az, 67 .net.az, 41 .int.az, 57 .co.az, 35 .pp.az, 40 .info.az, 16 .biz.az, 6 .name.az, 1 .mil.az, 1 .pro.az domeni istifadə edilir. Coğrafi adlardan ibarət 6 domen adı qeydə alınıb.
Ötən il ərzində 6199 domen qeydiyyatdan keçib və təxminən 2500 domen ləğv olunub. Nəticədə, ölkədə il ərzində domen artımı 3699 domen təşkil edib.
Azərbaycanda 2013-cü ildə 2012-ci illə müqayisədə qeydiyyatdan keçmiş domenlərin sayı 11% artıb, domen sayının xalis artımı isə 17% təşkil edib. Qeyd edilən artıma daha bir səbəb bu il ölkədə onlayn qeydiyyat sisteminin istifadəyə verilməsi olub.
Son 3 ildə .az domen zonasında kəskin artım müşahidə olunur və 2009-cu ildə illik artım 2 min domen təşkil edirdisə, 2010-cu ildə bu göstərici 3 min, 2011-ci ildə isə 4387, 2012-ci ildə 5478 olub.
