Təbii fəlakətləri daha dəqiq proqnozlaşdırmağa imkan verən peyk orbitə çıxarılıb

ABŞ Kosmik Agentliyinin (NASA) dünya okeanının müşahidəsi üçün "Jason-3" peyki "Falcon 9" raketdaşıyıcısının köməyi ilə orbitə çıxarılıb və istifadəyə hazırdır. Bu barədə "NASA" nümayəndələri açıqlama veriblər. 

"TASS" informasiya agentliyinin bildirdiyinə görə, "Jason-3" ABŞ və Avropa İttifaqı (Aİ) alimlərinin tədqiqatları üçün dünya okeanı səthini müşahidə etmək üçün nəzərdə tutulub. Gözlənilir ki, peykin köməyi ilə təbii fəlakətləri daha dəqiq proqnozlaşdırmaq, heyvanların miqrasiyasını izləmək, eləcə də iqlim dəyişikliklərinin effektini qiymətləndirmək mümkün olacaq.

Qeyd olunan peykdən əvvəl buraxılan "Jason-1" və "Jason-2" aparatları orbitə müvafiq olaraq 2001 və 2008-ci illərdə çıxarılıb. "Jason-1" fəaliyyətini 2013-cü ildə dayandırıb, "Jason-2" isə işini davam etdirir.