23-25 sentyabr tarixlərində Ümumdünya Poçt İttifaqının (ÜPİ) təşkilatçılığı ilə İsveçin Stokholm şəhərində “POST-EXPO-2014” beynəlxalq sərgi-konfransı keçiriləcək.
Sayca 18-ci sərgi-konfransda poçt, kuryer, ekspress sənaye ilə bağlı cari məsələlər və qlobal məkanda işgüzar münasibətlər müzakirə ediləcək. ÜPİ-dən verilən məlumata görə, sərgidə poçt və bağlama texnologiyaları, avadanlıqlar, sahə üzrə yeni xidmətlər nümayiş etdiriləcək.
Üç gün davam edəcək “POST-EXPO-2014” poçt, bağlama, təcili çatdırılma sənayesinin gələcək inkişafı haqda fikir və informasiya mübadiləsi üçün əsas platforma rolunu oynayaraq, dünyanın bu istiqamətdə əsas qərarverici liderlərini, o cümlədən baş direktorlar, menecerlər, təchizatçı və alıcıları bir araya gətirəcək. Sərgi-konfransda poçt texnologiyası üzrə beynəlxalq mükafatlar da təqdim ediləcək. Mükafatlar poçt sənayesinin müxtəlif istiqamətlərini əhatə edir.
Nominasiyalara “ilin ekoloji nailiyyəti”, “ilin təchizatçısı”, “ilin rəqəmli innovasiyası”, “Son mil çatdırılma üzrə ilin innovasiyası”, “ilin xidmətlər provayderi”, “ilin bağlama emalı innovasiyası”, “ilin biznesin inkişafı innovasiyası” kateqoriyaları daxildir.
Qeyd edək ki, “POST-EXPO” hər il dünyanın 85-dən artıq ölkəsini təmsil edən milli, özəl poçt operatorları, kuryer, poçt şirkətləri, biznes qurumları daxil olmaqla, 3500-dən çox iştirakçını cəlb edir.
