AMEA İnformasiya Texnologiyaları İnstitutunun Elmi şurasının iclasında antiplagiat xidmətinin yaradılması haqqında məruzə ilə çıxış edən institutun böyük elmi işçisi Rəhilə Həsənova plagiatlığın növləri haqqında məlumat verdi. Bildirdi ki, plagiatlıq birbaşa köçürmək, minimalist (mənbə materialından bir neçə söz və ya frazanın dəyişdirilməsi, lakin əsas məzmun və strukturun eyni saxlanılması), birləşdirmək və digər üsullarla həyata keçirilir.

O, həmçinin lisenziyasız proqram təminatı yükləmələri reytinqini və “Symantec” şirkətinin İnternet təhlükəsizliyi təhdidləri hesabatını təqdim etdi. Məruzəçinin sözlərinə görə, 2015-ci il hesabatına əsasən, həmin ildə hər gün 1 milyondan çox yeni təhdid yaradılıb, kibercinayət hücumlarının sayı 35% artıb və bu hücumların 65%-i kiçik və orta həcmli təşkilatlara hədəflənib.

R.Həsənova İnternetdə onlayn olaraq təqdim olunan antiplagiat sistemlərindən danışdı, plagiatlıqla mübarizə yollarını diqqətə çatdırdı. Antiplagiat sistemlərinin mətnin şəklini çəkib onu digər mətnlərlə müqayisə etməklə qiymətləndirilməsi, mətnlərin avtomatik avtoreferatının çıxarılması və onların yoxlanılması, latın və kiril əlifbalarına uyğun mümkün variasiyaların yoxlanılmasını həyata keçirdiyini qeyd etdi.

AMEA-nın akademik-katibi, AMEA İnformasiya Texnologiyaları İnstitutunun direktoru, akademik Rasim Əliquliyev antiplagiat sistemlərinin elmi-tədqiqat və təhsil müəssisələrində tətbiqinin plagiatlıqla mübarizə baxımından xüsusi əhəmiyyətə malik olduğunu diqqətə çatdırdı. Alim, həmçinin ölkəmizdə milli antiplagiat sisteminin yaradılmasının zəruriliyini vurğuladı.

Akademik antiplagiat sahəsində elmi-tədqiqatların aparılmasının vacibliyini önə çəkərək institutda bu istiqamətdə aparılan tədqiqatların daha da dərinləşdirlməsinin əhəmiyyətini qeyd etdi.

© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.