“Canalys” analitik şirkətinin yeni tədqiqatına əsasən, 2015-ci ildə qlobal 3D-printer bazarının həcmi 56 faiz yüksələrək 5,2 milyard ABŞ dolları təşkil edəcək.
ictnews elektron xəbər xidmətinin məlumatına görə, ekspertlər hesab edirlər ki, gələcəkdə üçölçülü çap bazarı sürətlə inkişaf edəcək. Gözləntilərə görə, 3D-printer bazarının həcmi orta illik artım sürəti 44 faiz olmaqla, 2019-cu ilədək 20,2 milyard dollara çatacaq.
“Gözlənildiyi kimi, son bir neçə ildə üçölçülü printer bazarının həcmi xeyli yüksəlib” - “Canalys” şirkətinin analitiki Co Kempton tədqiqatı şərh edir. Mütəxəssis bildirib ki, üçölçülü çap qurğularının sürəti təkmilləşdirilib, istifadə edilən materialların çeşidi genişləndirilib və yeni texnologiyalar yaradılıb.
Bundan başqa, bu bazara yiyələnmək istəyən şirkətlərin sayı xeyli çoxalıb. Yeni şirkətlərin əksəriyyəti Asiyanın payına düşür.
Yaxın beş ildə aerokosmik, avtomobil və tibbi sahələr 3D-printerlərin tətbiqi üzrə ən gəlirli sahələr olacaqlar. Analitiklər hesab edirlər ki, 3D-çapın tətbiqinə “General Electric”, “Boeing” və “BMW” kimi dünya nəhəngləri milyonlarla dollar sərmayə qoyacaqlar.
