Azərbaycan Tibb Universitetinin (ATU) I cərrahi xəstəliklər kafedrası və AR Elm və Təhsil Nazirliyinin İnformasiya Texnologiyaları İnstitutunun əməkdaşları tərəfindən hazırlanan, tələbələr və rezidentlər üçün nəzərdə tutulan “Cərrahi platforma” adlı çoxdilli və çoxfunksiyalı tədris portalının hibrid formatda təqdimat mərasimi keçirildi.
Tədris-Cərrahiyyə Klinikasında keçirilən tədbiri giriş sözü ilə ATU-nun elmi işlər üzrə prorektoru, professor Rauf Bəylərov açaraq 8 dildə fəaliyyət göstərən “Cərrahi platforma” tədris portalını təhsil sahəsində elektronlaşma və interaktiv tədris mexanizmlərinin tətbiqi istiqamətində həyata keçirilən mühüm layihələrdən biri kimi qiymətləndirdi, bu resursun həm müəllimlər, həm də tələbə və rezidentlər üçün çox faydalı olacağına inamını bildirdi.
Sonra AR səhiyyə nazirinin müavini, dosent Nadir Zeynalov çıxış edərək son zamanlar bütün sahələrdə olduğu kimi, tibb təhsili sferasında da informasiya texnologiyalarından geniş istifadə, onlayn təhsil platformaları və müasir bilik resurslarının yaradılması, o cümlədən yeni yanaşmaların səhiyyədə tətbiqi məsələlərinin böyük aktuallıq kəsb etdiyini söylədi. Bildirdi ki, ATU-nun I cərrahi xəstəliklər kafedrası onlayn tədris metodikasının tətbiqi baxımından universitetin öndə gedən kafedralarından biridir.
“Cərrahi platforma” portalının əhəmiyyətini vurğulayan Nazir müavini universitetin digər kafedralarında da onlayn öyrənmə və tədris platformalarından istifadə olunmasının zəruriliyini qeyd etdi. Bu kimi platformaların tələbələr və rezidentlərin keyfiyyətli bilik mənbələrindən istifadə edərək təkmilləşmələri, inkişaf etmələri üçün son dərəcə faydalı olduğunu diqqətə çatdırdı.
Sonra tədbirdə AMEA-nın vitse-prezidenti, İnformasiya Texnologiyaları İnstitutunun baş direktoru, akademik Rasim Əliquliyev çıxış edərək, əvvəlcə Azərbaycan Tibb Universiteti ilə mövcud olan əməkdaşlıq əlaqələrindən bəhs etdi. Akademik İnformasiya Texnologiyaları İnstitutunun mütəxəssislərinin bu ali məktəbin telekommunikasiya infrastrukturunun yenidən qurulmasında fəal iştirak etdiklərini, qabaqcıl texnologiyaların tətbiqi ilə elektron tibbin inkişaf etdirilməsi, səhiyyənin informasiyalaşdırılması və e-tibb xidmətlərinin keyfiyyətinin artırılması işlərinə dəstək verdiklərini söylədi.
AMEA-nın vitse-prezidenti institutda e-tibb sahəsində həyata keçirilən tədqiqatlardan söz açaraq bu elmi müəssisənin alim və mütəxəssisləri tərəfindən rəqəmsal tibb, tibbi demoqrafiyanın formalaşması, e-tibdə Big Data və Data Mining texnologiyalarının tətbiqi istiqamətində tədqiqatların aparıldığını, eyni zamanda Tibb Universiteti ilə birgə qaraciyər xərçənginin erkən diaqnozu üçün intellektual metodların, səhiyyə 4.0 mühitində Əhalinin Sağlamlığı Observatoriyasının formalaşmasının elmi-nəzəri əsaslarının işlənildiyini nəzərə çatdırdı.
“Cərrahi platforma” tədris resursunun əhəmiyyətinə toxunan alim bu açıq portalının həm müəllimlər, həm də tələbələr üçün zəruri biliklərin əldə edilməsi baxımından mühüm platforma rolunu oynadığını dedi, sistemin gələcəkdə daha da inkişaf etdirilməsinin vacibliyini vurğuladı.
AMEA-nın müxbir üzvü, ATU-nun I cərrahi xəstəliklər kafedrasının müdiri, professor Nuru Bayramov çıxış edərək, “Cərrahi platforma” tədris portalını təqdim etdi, bu onlayn tədris resursunun əsas mahiyyəti, funksionallığı və məzmunu haqqında ətraflı məlumat verdi. Portalın, ilk növbədə, tələbə və rezidentlər üçün nəzərdə tutulduğunu diqqətə çatdıran alim bildirdi ki, bu virtual sistemdə hər bir xəstəlik haqqında məlumatlar həm qısa, həm də geniş həcmdə təqdim olunur.
Prof. N.Bayramovun sözlərinə görə, “Cərrahi platforma”da xəstəliyin diaqnozunun dəqiqləşdirilməsi, düzgün müayinə və müalicə taktikalarının seçilməsi ilə bağlı məlumatlar sual-cavab və slaydlar formatında təqdim olunmuşdur. Eyni zamanda tələbə və rezidentlər bu portalda professor və müəllim heyətinin təcrübəsinə əsaslanan məlumatlarla, mühazirə mətnləri ilə tanış ola biləcəklər.
Portal hazırlanarkən beynəlxalq təcrübənin və müasir veb-saytlara qoyulan tələblərin nəzərə alındığını deyən prof. N.Bayramov bu platformanın ərsəyə gəlməsində göstərdiyi köməkliyə görə akademik Rasim Əliquliyevə və İnformasiya Texnologiyaları İnstitutunun mütəxəssislərinə minnətdarlığını bildirdi. “Cərrahi platforma”nın gələcəkdə daha da təkmilləşdirilməsi, yeni elmi və praktiki məlumatlarla, foto və video materiallarla zənginləşdirilməsinin nəzərdə tutulduğunu vurğuladı.
Tədbirdə həmçinin Ümumdünya Səhiyyə Təşkilatının Azərbaycan nümayəndəliyinin məsul şəxsi, professor İbrahim Durak çıxış etdi. O, portalın müxtəlif xəstəliklərlə bağlı zəruri tibbi biliklərin, kliniki əhəmiyyətli məlumatların əldə edilməsi baxımından tələbə və rezidentlər üçün mühüm bilik mənbəyi olduğunu bildirdi.
Daha sonra tədbirdə ATU Tədris-Cərrahiyyə Klinikasının Ürək-Damar Cərrahiyyəsi şöbəsinin müdiri, professor Məmməd Kərimov, ATU-nun Şüa diaqnostika kafedrasının müdiri, professor Məlahət Sultanova, Türkiyənin Qazi Universitetinin professoru Mustafa Kərim, Türkiyənin Azərbaycandakı səfirliyinin təhsil müşaviri Yurdagül Aydoğan və digərləri çıxış edərək, “Cərrahi platforma” portalının əhəmiyyətindən danışdılar. Çıxış edənlər portalın unikal xüsusiyyətlərə malik olduğunu, bu resursun Azərbaycan Tibb Universiteti ilə İnformasiya Texnologiyaları İnstitutunun birgə əməyi, zəhməti və intellekti nəticəsində ərsəyə gəldiyini vurğuladılar. Platformanın təqdimatı ilə bağlı məsələnin Tibb Universitetinin Elmi şurasında müzakirə edilməsinin, digər kafedralarda da belə bir portalın yaradılmasına dəstək göstərilməsinin məqsədəuyğun olduğunu qeyd etdilər.
© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.
