Cənubi Koreyada selfi üçün aksessuarlar sertifikatlaşdırılacaq

Cənubi Koreyanın Elm Nazirliyi bildirib ki, selfi üçün ştativlərin satıldığı ticarət nöqtələri bu aksessuarları sertifikatlaşdırmalıdır. Əks təqdirdə həmin obyektlər 30 milyon von (27 min dollar) dəyərində cərimələnəcək və 3 ilədək həbs cəzası kəsiləcək.     

hitech.newsru.com saytının məlumatına görə, “Selfi stik” qurğusunun bir tərəfinə smartfon bərkidilir, bəzi modellərində isə fotokadrın qurulmasını asanlaşdırmaq üçün güzgüdən də istifadə olunur. Fotoçəkilişin özü naqilsiz Bluetooth-un köməyilə aktivləşir. 

Məhz Bluetooth modulunun aksessuarda mövcudluğu koreyalı məmurların bu cür tələblərinə səbəb olub. Onların fikrincə, qurğu elektromaqnit şüalanma yarada və digər elektron qurğularda problemlərə səbəb ola bilər.

© Bütün hüquqlar qorunur. Xəbərlərdən istifadə edərkən www.ict.az saytına istinad zəruridir.