Bakıda keçiriləcək 73-cü Beynəlxalq Astronavtika Konqresində institut fəal iştirak etməlidir Oktyabr 20, 2020 | 10:58 / Konfranslar, iclaslar

AMEA İnformasiya Texnologiyaları İnstitutunun Elmi şurasının növbəti onlayn iclasında 2022-ci ildə Bakıda keçiriləcək 73-cü Beynəlxalq Astronavtika Konqresində institutun iştirakı məsələsi müzakirə olundu.

AMEA-nın vitse-prezidenti, institutun direktoru, akademik Rasim Əliquliyev ABŞ-ın paytaxtı Vaşinqtonda Beynəlxalq Astronavtika Federasiyasının Baş Assambleyasındakı seçkilər zamanı Bakı şəhərinin 2022-ci ildə keçiriləcək Beynəlxalq Astronavtika Konqresinə ev sahibliyi etmək hüququnu qazandığını diqqətə çatdırdı.

Alim qeyd etdi ki, dünyanın 68 ölkəsini təmsil edən 398 təşkilatın üzv olduğu federasiya kosmik sahədə fəaliyyət göstərən ən mötəbər beynəlxalq təşkilatdır. 1950-ci ildən bəri fərqli ölkələrdə keçirilən Beynəlxalq Astronavtika Konqresi təşkilatın əsas tədbiridir. Konqres zamanı iştirakçılar kosmos sahəsinə aid aktual trendləri və ən son innovasiyaları izləmək fürsəti əldə edirlər.

“Konqres 1973-cü ildə ulu öndər Heydər Əliyevin Azərbaycanın rəhbəri kimi göstərdiyi səylər nəticəsində keçmiş Sovet İttifaqında yalnız bir dəfə məhz Bakı şəhərində keçirilmişdir. Bu da öz növbəsində Azərbaycanın kosmonavtika tarixinin əsasını qoymuş, növbəti ildə kosmik texnologiyaların köməyilə elmi mərkəz yaradılmış və kosmik tədqiqatların aparılmasına start verilmişdir. Həmin illərdə tədbirdə dünyanın 17 ölkəsindən 1500-dən çox nümayəndə iştirak etmişdir. Hazırda isə paytaxtımızda keçiriləcək bu konqres kosmos ictimaiyyətinin 6000-dən çox nümayəndəsini bir araya toplamağı nəzərdə tutur. Bakı şəhərinin hər il keçirilən beynəlxalq konqresə ev sahibliyi etmək hüququnu qazanmasında Cənubi Qafqazda ilk peyk operatoru olan “Azərkosmos”un böyük əməyi vardır”, – deyə R.Əliquliyev bildirdi.

Akademik dünyanın kosmik sahədə aparıcı agentlikləri, elm mərkəzləri və beynəlxalq təşkilatlarının rəhbərləri, eləcə də tanınmış alimlər, gənc tədqiqatçılar və tələbələr də daxil olmaqla, dünya kosmos ictimaiyyətinin nümayəndələrinin Azərbaycanda bir araya gələcəklərini nəzərə çatdırdı. Qeyd etdi ki, tədbirin yüksək səviyyədə təşkil olunmasında AMEA-nın elmi müəssisələri, xüsusən də İnformasiya Texnologiyaları İnstitutu fəal iştirak etməlidir. Big data və kosmik tədqiqatlar, kiber-fiziki sistemlərlə kosmik texnologiyaların konvergensiyası, kosmosdan toplanmış məlumatların iqtisadi müstəviyə gətirilməsi və s. istiqamətlərdə tədqiqatların aparılması zəruridir və institutun alimləri bu işə öz töhfələrini verməlidirlər.

Alim Azərbaycanda Beynəlxalq Astronavtika Konqresinin keçirilməsinin ölkəmizdə kosmik sahənin formalaşması və inkişafı nəticəsində əldə edilmiş tarixi nailiyyət olduğunu vurğuladı: “Bu tədbir turizm sektoruna müsbət təsir göstərməklə yanaşı, ölkəmizin adət-ənənələrini, tarixini və həqiqətlərini dünyaya bir daha nümayiş etdirməyə imkan yaradacaq, kosmik elmin sürətli inkişafı və bu sahədə əlaqələrin genişləndirilməsinə təkan verəcək”.

© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.

İŞ FƏALİYYƏTİNİZƏ BİZİMLƏ BAŞLAYIN!
Ətraflı
BİZİM YARADICI VƏ ÖZÜNƏMƏXSUS İDEYALARIMIZA ETİBAR EDİN!
Ətraflı
ƏLVERİŞLİ QİYMƏTLƏRƏ KEYFiYYƏTLİ VƏ RƏNGARƏNG NƏŞRİYYAT İŞLƏRİ!
Ətraflı
İT BİLİKLƏRİNİZİ İNKİŞAF ETDİRƏRƏK KARYERANIZI DƏYİŞİN!
Ətraflı
ZƏNGİN E-KİTABXANA XİDMƏTLƏRİ!
Ətraflı