AMEA İnformasiya Texnologiyaları İnstitutunda Elmi şuranın növbəti iclası keçirildi. Öncə AMEA-nın akademik-katibi, institutun direktoru, akademik Rasim Əliquliyev tədbiri giriş sözü ilə açaraq gündəlikdə duran məsələləri diqqətə çatdırdı.  

Sonra Ümumi şöbənin müdiri Dinara Zeynalova 2017-ci ilin sentyabr-oktyabr ayları üçün institut əməkdaşlarına verilmiş tapşırıqların icra vəziyyəti barədə məlumat verdi. O, tapşırıqlara əsasən, müxtəlif problemlərə həsr olunmuş elmi seminarların təşkili, elmi-praktiki konfransların keçirilməsi, aparılan araşdırmalarla bağlı icmalların hazırlanması və təqdim olunması, institutun doktorant və dissertantlarının dissertasiya işlərinin icra vəziyyəti, elmi tədqiqatların nəticələrinə dair məqalələrin hazırlanması və digər tapşırıqların yerinə yetirilməsi ilə bağlı məsələlərdən danışdı.

Sonra çıxış edən akademik R.Əliquliyev institut əməkdaşlarına müvafiq tapşırıqlar üzrə tövsiyələrini verdi, hər bir tədqiqatçını mövzuları üzrə elmi araşdırmaları dərinləşdirməyə, beynəlxalq təcrübəni öyrənməyə və dünya elminə inteqrasiya etməyə çağırdı. Alim, həmçinin institut əməkdaşlarının beynəlxalq proqramlarda və qrant layihələrdə iştirakı ilə bağlı zəruri tədbirlərin həyata keçirilməsinin vacibliyini vurğuladı.

© Bütün hüquqlar qorunur. Xəbərlərdən istifadə edərkən www.ict.az saytına istinad zəruridir.