AMEA İnformasiya Texnologiyaları İnstitutunun 5 saylı şöbəsinin 2019-cu il ərzində apardığı elmi-tədqiqat işlərinin hesabatı müzakirə olundu. Şöbə müdiri Səyyar Abdullayev rəhbərlik etdiyi şöbədə informasiya texnologiyaları və informasiya cəmiyyətinin formalaşmasının elmi-nəzəri problemlərinin araşdırılması və effektiv metodların işlənilməsi istiqaməti, eləcə də informasiya texnologiyaları üzrə terminologiya məsələlərinin araşdırılması mövzusu üzrə aparılan tədqiqatları diqqətə çatdırdı.
Məruzəçi bildirdi ki, hesabat dövrü ərzində elektron terminoqrafiyanın elmi-nəzəri problemləri, həlli yolları, müasir vəziyyəti, milli terminoloji sistem əsasında terminoloji proseslərin idarə edilməsi və təşkili ilə bağlı araşdırmalar aparılmış, məqalələr nəşr olunmuşdur.
S.Abdullayev elmi-innovasiya və praktiki fəaliyyət çərçivəsində informasiya texnologiyaları üzrə ən müasir terminlərin işlənilməsi ilə bağlı görülmüş işləri təqdim etdi. Onun sözlərinə görə, cari ildə «ELMİ KADRLAR» Milli informasiya sisteminə şöbənin əməkdaşları haqıında informasiya daxil edilmiş, innovativ fəaliyyət üçün təkliflər hazırlanmışdır.
Həmçinin “İnformasiya texnologiyaları üzrə müasir terminlər lüğəti” çap olunmuşdur.
O, şöbədə cari il ərzində elmi-pedoqoji, elmi-təşkilati fəaliyyət, beynəlxalq və respublika səviyyəli tədbirlərdə iştirak, tanınmış elmi jurnallarda məqalələrin dərci, elmi-praktiki nəticələrin KİV-də təbliği ilə bağlı görülmüş işləri də nəzərə çatdırdı.
Daha sonra şöbənin illik hesabatına dair müzakirələr aparıldı, bir sıra təkliflər səsləndirildi. AMEA-nın vitse-prezidenti, institutun direktoru, akademik Rasim Əliquliyev çıxış edərək terminoqrafiya fəaliyyətinin dilimizə daxil olan yeni sözlərin toplanması və sistemləşdirilməsi baxımından əhəmiyyətini qeyd etdi, bu sahədə aparılan araşdırmaların daha da dərinləşdirilməsini tövsiyə etdi.
© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.
