AMEA İnformasiya Texnologiyaları İnstitutunda “MiKRO Information Handling and Distribution” şirkətinin nümayəndəsi Mehmet Haseki ilə görüş keçirildi.
Tədbirdə institutun şöbə müdiri, texnika üzrə elmlər doktoru Ramiz Alıquliyev, şöbə müdirləri, texnika üzrə fəlsəfə doktorları Vüqar Musayev və Fərhad Yusifov, Elektron Kitabxana Mərkəzinin rəhbəri Mədinə Səidova və Mərkəzin əməkdaşları iştirak edirdilər.
“MiKRO Information Handling and Distribution” şirkətinin fəaliyyət istiqamətləri haqqında məlumat verən M.Haseki qurumun dünya üzrə internet-kitabxana xidməti təqdim etdiyini və “open access” jurnallara bir mərkəzdən girişi təmin edən platforma olduğunu bildirdi.
Şirkətə müraciət edən müəssisələrin “World eBook Library” və “Global e-Journals Library”nin bazasından 2 ay ərzində ödənişsiz olaraq yararlanmaq imkanına malik olduğunu söyləyən qonaq dünya üzrə bu xidmətlərdən istifadə edən şirkətləri diqqətə çatdırdı.
M.Haseki qeyd etdi ki, elektron kitablar, akademik tədqiqatlar və audio-kitablardan ibarət olan “World eBook Library” dünyada elektron kitab və sənədlərin ən böyük arxividir. Elmi tədqiqatlara dair 200 dildə 3 milyondan çox elektron kitab və sənədin təqdim olunduğu kitabxanada abunəçilər bütün kolleksiyaya tam giriş əldə edirlər.
O, həmçinin “Global e-Journals Library”nin təqdim etdiyi imkanlar haqqında da məlumat verdi. Bu elektron kitabxananın dünyanın 135 ölkəsində 125 il ərzində nəşr olunmuş 9 milyondan çox məqaləni əhatə edən 22 mindən çox jurnala “open access” təklif edən ilk məlumat bazası olduğunu qeyd etdi. Bildirdi ki, burada jurnal və məqalələr avtomatlaşdırılmış şəkildə deyil, kitabxanaçılar tərəfindən toplanmış, emal edilmiş və təsnif edilmişdir.
Sonra M.Haseki “World e-book Library”dən istifadə qaydaları haqqında təqdimatla çıxış etdi.
Sonda dünya səviyyəsində səmərəli elmi araşdırmaların aparılması və innovativ elmi nəticələrin əldə olunması baxımından bu kimi nüfuzlu təşkilatlarla əməkdaşlıq əlaqələrinin qurulmasının vacibliyi qeyd olundu.
© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.
