ETN İnformasiya Texnologiyaları İnstitutunun şöbə müdiri, texnika üzrə fəlsəfə doktoru Gülnarə Nəbibəyovanın məruzəsi “Kibernetika və İnformatikanın Problemləri” mövzusunda 6-cı beynəlxalq konfransda (PCI 2025) dinlənilib.
G.Nəbibəyova “Rəqəmsal dövlət mühitində smart OLAP sistemlərinin tətbiqi” adlı məruzəni təqdim edərək “rəqəmsal dövlət” anlayışı, onun müsbət cəhətləri və mümkün riskləri haqqında məlumat verib.
Məruzəçi rəqəmsal dövlətin elmi, nəzəri və konseptual əsaslarının formalaşmasına dair əsas yanaşmaları göstərən bəzi tədqiqatçıların əsərlərindən bəhs edib. G.Nəbibəyovanın sözlərinə görə, iş çərçivəsində rəqəmsal dövlət mühitində daxili smart OLAP sistemli qərar qəbuletmə sisteminin modeli işlənilmişdir.
“Ağıllı OLAP sisteminə Data Mining, neyron şəbəkələri və blokçeyn kimi rəqəmsal texnologiyalar daxildir ki, bu da məlumatların dərin, sürətli çıxarılmasına və daha dəqiq qərarların qəbul edilməsinə imkan verir”, – deyən G.Nəbibəyova bu texnologiyaların hər biri ilə OLAP sisteminin inteqrasiyası üçün modellərdən bəhs edib, eləcə də işlənilmiş hibrid modeli təqdim edərək onun haqqında ətraflı məlumat verib.
G.Nəbibəyova tədqiqat işində rəqəmsal dövlətin effektivliyin qiymətləndirilməsi üsullarının təklif olunduğunu diqqətə çatdırıb.
Məruzə ətrafında müzakirələr aparılıb, suallar cavablandırılıb.
