ETN İnformasiya Texnologiyaları İnstitutunun icraçı direktoru, t.f.d., dosent Rəşid Ələkbərov və institutun baş mütəxəssisi Oqtay Ələkbərovun həmmüəllifi olduqları məruzə “Kibernetika və İnformatikanın Problemləri” mövzusunda 6-cı beynəlxalq konfransında (PCI 2025) dinlənilib.
“Verilənlərin Emalı Mərkəzlərinin soyutma sistemlərində istilik sıxlığının azaldılması və enerji səmərəliliyinin artırılması modeli” mövzusunda məruzəni O.Ələkbərov təqdim edib. O, müasir texnologiyaların inkişafı şəraitində Verilənlərin Emal Mərkəzlərində enerji sərfiyyatı və soyutma sistemlərinin rolundan bəhs edib. Bildirib ki, enerjinin əsas hissəsi serverlər və soyutma sistemləri tərəfindən istifadə olunur ki, bu da həm əməliyyat xərclərinə, həm də enerji səmərəliliyinə mühüm təsir göstərir.
Məruzəçi ənənəvi maye, təbii, buxarlandırıcı və sıra daxili soyutma sistemlərini müqayisəli şəkildə analiz edib, onların enerji effektivliyi və tətbiq imkanları barədə məlumat verib.
O.Ələkbərovun sözlərinə görə, tədqiqat işində təklif edilən model server rəfləri üzrə istilik sıxlığının optimal paylanmasına əsaslanır: “Yüksək istilik yüklü rəflərdə yerləşən avadanlıqların bir hissəsinin daha az yüklü rəflərə köçürülməsi nəticəsində maksimum və minimum istilik sıxlığı fərqinin minimuma endirilməsi təmin edilir”.
Tədqiqatçı çıxışının sonunda vurğulayıb ki, təklif olunan model soyutma sistemlərinin yükünü balanslaşdırır, enerji istifadəsini optimallaşdırır, əməliyyat xərclərini azaldır və avadanlıqların istismar etibarlılığını artırır.
© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.
