ETN İnformasiya Texnologiyaları İnstitutunda “Sənaye 4.0 platformasında e-elm və e-təhsilin inteqrasiyasının elmi-metodoloji və praktiki problemlərinin tədqiqi” mövzusu çərçivəsində rəqəmsal inkişaf çağırışları əsasında e-elm və e-təhsil mühitinin inkişafı perspektivləri, eyni zamanda bu mühitdə süni intellekt əsaslı innovasiyaların formalaşması və inkişafı istiqamətində tədqiqatlar aparılır.
Bu barədə institutun Elmi şurasının iclasında e-elmin formalaşması və elmmetriya problemləri üzrə fəaliyyət göstərən şöbənin 2025-ci ilin birinci yarısı üzrə hesabatının müzakirəsində şöbə müdiri, AMEA-nın müxbir üzvü Ramiz Alıquliyev məlumat verib.
Alim cari ilin birinci yarısında rəhbərlik etdiyi struktur bölmədə rəqəmsal tranformasiyalar və informasiya cəmiyyətinin formalaşmasının elmi-nəzəri əsaslarının araşdırılması və inkişaf etdirilməsi istiqamətində aparılan tədqiqatlar haqqında məlumat verib. “Vətəndaş elmi layihələrində Industry 4.0 həllərinin tətbiqi” mövzusunda böyük verilənlərlə xarakterizə olunan vətəndaş elmi problemlərində dərin təlim metodlarının tətbiqi problemlərinin, o cümlədən rəqəmsal və dayanıqlı inkişaf məsələlərində vətəndaş elminin təsir imkanlarının araşdırıldığını söyləyib.
Şöbə müdiri həmçinin “Elmi fəaliyyətin bəzi göstəricilərinin qiymətləndirilməsi üçün metod və alqoritmlərin işlənilməsi” adlı dissertasiya işi çərçivəsində aparılan tədqiqatlardan bəhs edib, bu istiqamətdə tədqiqatçıların elmi fəaliyyətinin qiymətləndirilməsi metodlarının müqayisəli analizinin aparıldığını və çoxmeyarlı qiymətləndirilmə üçün metodun işlənildiyini diqqətə çatdırıb.
Alim cari il ərzində Web of Science, Scopus və digər beynəlxalq elmi bazalarda indeksləşən jurnallarda, eləcə də Ali Attestasiya Komissiyasının tövsiyə etdiyi dövri elmi nəşrlərdə, o cümlədən respublika və beynəlxalq səviyyəli konfranslarda çapı nəzərdə tutulan məqalə və tezislər haqqında məlumat verib.
AMEA-nın müxbir üzvü R.Alıquliyev şöbə əməkdaşlarının elmi-praktiki və innovasiya, elmi-ekspertiza, elmi-təşkilati, elmi-pedaqoji fəaliyyəti, qrant layihələrində iştirak, kadr hazırlığı, elmin populyarlaşdırılması və təbliği ilə bağlı görülmüş işlərdən də bəhs edib.
Sonra şöbənin yarımillik hesabatına dair müzakirələr aparılıb, suallar cavablandırılıb.
AMEA-nın vitse-prezidenti, institutun baş direktoru, akademik Rasim Əliquliyev çıxış edərək, şöbənin elmi fəaliyyətinin gücləndirilməsi, aktual elmi problemləri əhatə edən tədqiqatların dərinləşdirilməsi, tədqiqatların nəticələrinin institutun elmi seminarında müzakirə olunması ilə bağlı təklif və tövsiyələrini səsləndirib.
Elmi şuranın qərarı ilə şöbənin yarımillik hesabatı qənaətbəxş hesab olunub.
© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.
