ETN İnformasiya Texnologiyaları İnstitutunun Elmi şurasının iclasında institut əməkdaşlarının Azərbaycan Elm Fondu tərəfindən keçiriləcək qrant layihələrində iştirakına dair məruzə dinlənilib.
Bu barədə institutun elmi katibi Nərmin Adıgözəlova çıxış edib. O, əvvəlcə Azərbaycan Elm Fondunun “Əsas Qrant Müsabiqəsi-2025” haqqında məlumat verib. Bildirib ki, bu layihə aparıcı alimlər tərəfindən həyata keçirilən elmi tədqiqatlar çərçivəsində fundamental və tətbiqi xarakterli elmi tədqiqatlar üçün ayrılan qrant müsabiqəsidir. Əlavə edib ki, müsabiqədə iştirak etmək üçün layihələrin qəbulunun son tarixi aprel 10-u, çap versiyasının qəbulu üçün isə aprelin 11-dir.
Gənc Alim və Tədqiqatçıların 9-cu qrant müsabiqəsi haqqında məlumat verən N.Adıgözəlova bildirib ki, bu layihənin əsas məqsədi gənc alim və tədqiqatçıların elmi fəaliyyətinin stimullaşdırılması və onlara elmi tədqiqatlar aparmaq üçün əlverişli imkanların yaradılmasıdır. Müsabiqədə iştirak etmək üçün layihələrin qəbulunun son tarixi aprelin 10-u, çap versiyasının qəbulu üçün isə aprelin 11-dir.
Elmi katib “Qarabağ - Azərbaycandır!”-3 qrant müsabiqəsi haqqında məlumatları da diqqətə çatdırıb. Onun sözlərinə görə, bu qrant layihəsinin keçirilməsində əsas məqsəd azad edilmiş ərazilərimizin inkişafına töhfə verə biləcək müxtəlif elmi sahələri əhatə edən tədqiqat işlərinin stimullaşdırılması, Qarabağın qədim və orta əsrlər tarixinin araşdırılması, ekoloji problemlərin aradan qaldırılması, enerji və su ehtiyatının yaradılmasına gətirib çıxara bilən fundamental-tətbiqi xarakterli layihələrin həyata keçirilməsidir: “Əməkdaşlar layihələri 10 aprel 2025-ci il tarixinədək təqdim edə bilərlər. Müsabiqənin nəticələrinin 2025-ci ilin sonunda açıqlanması planlaşdırılır”.
N.Adıgözəlova həmçinin 14-cü “Mobillik qrantı” məqsədli müsabiqəsi haqqında məlumat verib.
Sonra qrant layihələri ilə bağlı müzakirələr aparılıb, təklif və tövsiyələr səsləndirilib, müvafiq qərarlar qəbul olunub.
AMEA-nın vitse-prezidenti, institutun baş direktoru, akademik Rasim Əliquliyev çıxış edərək, elmi fəaliyyətin səmərəliliyinin artırılması, əməkdaşların əməyinin stimullaşdırılması, eləcə də əldə edilən nailiyyətlərin geniş ictimaiyyətə çatdırılması baxımından qrant layihələrinin vacibliyini vurğulayıb. Alim bütün gəncləri institutda yaradılmış şəraitdən istifadə edərək məqsədyönlü fəaliyyət göstərməyə, öz üzərlərində çalışmağa və qrant layihələrində fəal iştirak etməyə çağırıb.
© Bütün hüquqlar qorunur. Xəbərlərdən istifadə edərkən www.ict.az saytına istinad zəruridir.
