AR ETN İnformasiya Texnologiyaları İnstitutunun bir qrup əməkdaşı 24-25 oktyabr tarixlərində Bakı Ekspo Mərkəzində STEAM (Science, Technology, Engineering, Art and Math) Azərbaycan layihəsinin təşkilatçılığı ilə keçirilən Beynəlxalq Yaşıl STEAM Azərbaycan Festivalında (SAF 2024) iştirak edib.
Əməkdaşlar BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP 29) Azərbaycanda keçirilməsi və 2024-cü ilin ölkəmizdə “Yaşıl dünya naminə həmrəylik ili” elan edilməsi ilə əlaqədar STEAM əsaslı innovativ layihələr ilə tanış olublar. Onlar festival çərçivəsində ölkədə fəaliyyət göstərən müxtəlif orta məktəbləri təmsil edən şagirdlər arasında keçirilən “Yaşıl təşəbbüslər”, “Yaşıl kodlaşdırma” “Dron texnologiyaları” kimi mövzulara həsr olunan yarışları izləyiblər.
Qeyd edək ki, SAF 2024-ün keçirilməsində əsas məqsəd STEAM əsaslı tədrisin təşviqi, şagirdlər arasında XXI əsr bacarıqlarının inkişaf etdirilməsi, yaradıcı, rəqəmsal texnologiya biliciləri olan gənclərin müəyyənləşdirilməsi, eləcə də innovasiyalar və rəqəmsallaşma üzrə beynəlxalq təcrübənin öyrənilməsidir.
© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.
