Yaponiyanın Meiji Universitetinin süni intellekt mütəxəssisi Juniçi Takeno süni intellekt sahəsində son dövrlərdə əldə edilən uğurlardan danışaraq nəzərə çatdırıb ki, artıq insan şüurlu robotların hazırlanması üzərində işlər gedir.
Yaponiyalı professor etiraf edib ki, elm hələ də insan şüurunu tamamilə öyrənə bilməyib. Buna baxmayaraq, artıq robotlar da insanlara və “ən ağıllı” heyvanlara xas olan bəzi hərəkətləri mənimsəyə biliblər.
onauke.info saytının verdiyi xəbərə görə, yapon alimin rəhbərlik etdiyi tədqiqatçılar qrupu insanların duyğularını anlaya biləcək, onların hərəkətlərini təqlid edə biləcək, hətta, güzgüdə özünü tanıya biləcək robotlar yaradıblar. Mütəxəssislər neyron şəbəkələrin köməyi ilə həmin robotlara öz hisslərini yaşamağı “öyrətməyə” çalışırlar.
Juniçi Takenonun sözlərinə görə yaxın gələcəkdə robotlar öz hərəkət və davranışlarını dərk edə və öz hisslərini sərbəst şəkildə ifadə edə biləcəklər. O, vurğulayıb ki, gələcəkdə robotlar şəfqət, sevinc və digər insana xas olan hissləri mənimsəyə bilsələr, deməli, süni intellektlə bağlı elmi-fantastik filmlərdə əks olunanlar reallaşa bilər.
Yapon alimlər apardıqları tədqiqatlar zamanı Edmund Husserl və başqa dünyaşöhrətli alimlərin insan şüuru ilə bağlı elmi araşdırmalarına istinad ediblər.
© Bütün hüquqlar qorunur. Xəbərlərdən istifadə edərkən www.ict.az saytına istinad zəruridir.
