Ər-Riyadda keçirilən “Future Investment Initiative” adlı iqtisadi konfransda Sofiya adlı insanabənzər robota Səudiyyə Ərəbistanı vətəndaşlığı verilib.
“Səudiyyə Ərəbistanı Krallığına təşəkkür edirəm. Mən vətəndaşlıq almış ilk robot oldum”, – deyə Sofiya bildirib.
lenta.ru saytının məlumatına görə, Səudiyyə Ərəbistanında mövcud olan sərt qaydalar ölkə əhalisinin üçdə birini təşkil edən əcnəbi işçilərə vətəndaşlıq verməyə imkan vermir.
2016-cı ilin martında Sofiya müsahibə zamanı “İnsanları öldürəcəksənmi?” sualını “bəli” deyə cavablandırmışdı. 2017-ci ilin aprelində ABŞ televiziyasında çıxış etmiş robot dünyanı ələ keçirmək arzusundan bəhs etmiş, sonra bunun yalnız zarafat olduğunu bildirmişdi.
İnsanabənzər robot 60-dan çox emosiyanı təsvir edə bilir. Onun gözlərinə yerləşdirilmiş xüsusi kameralar həmsöhbətlə göz təması qurmaq üçün nəzərdə tutulub. Humanoidin yaradıcısı Devid Hanson onu hazırlayarkən britaniyalı aktrisa Odri Hepbernin obrazlarından ilhamlanıb.
© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.
