13-18 sentyabr 2021-ci il tarixlərdə Rusiyanın Kalininqrad şəhərində “Paralel Hesablama Texnologiyaları” (Parallel Computing Technologies – PaCT-2021) XVI beynəlxalq konfransı keçiriləcək.
Hesablama Riyaziyyatı və Riyazi Geofizika İnstitutu (Rusiya Elmlər Akademiyası, Novosibirsk), İmmanuel Kant Baltik Federal Universiteti, Novosibirsk Dövlət Universiteti və Novosibirsk Dövlət Texniki Universiteti tərəfindən təşkil olunan birgə konfransın məqsədi paralel hesablama texnologiyalarında yeni tendensiyalar və tətbiqetmələr haqqında ümumi məlumat verməkdir. “PaCT-2021” dünyanın hər yerindən gələn alim və mütəxəssislər arasında fikir mübadiləsi üçün forum rolunu oynayaraq, cəmiyyətdə paralel hesablama texnologiyaları ilə bağlı təsəvvürü dərinləşdirməyə kömək edəcək.
Konfrans Rusiya Təhsil və Elm Nazirliyi, Rusiya Elmlər Akademiyası və Rusiya Fundamental Tədqiqatlar Fondu tərəfindən maliyyələşdirilir.
Tədbirin əsas müzakirə mövzularına paralel kompüter sistemlərinin tətbiqinin bütün texnoloji aspektləri, yüksək səviyyəli paralel proqramlaşdırma dilləri və sistemləri, böyük miqyaslı problemlərin paralel həlli üçün metod və vasitələr, paralel emalı dəstəkləyən proqram vasitələri və dillər, əməliyyat sistemləri, xəritəçəkmə, şəbəkə və bulud hesablamaları üçün proqram, alqoritm və proqramların fraqmentasiya və aqreqasiyası, proqramların yığılması və yenidən istifadəsi, paylanmış alqoritmlər və s. daxildir.
© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.
