İyulun 2-3-də İstanbulda (Türkiyə) Nanoelm və nanotexnologiyalara həsr olunmuş III Beynəlxalq Konqres (3rd International Congress on Nanoscience and Nanotechnology - ICNT 2015) keçiriləcək.
İstanbul və Hacettepe Universitetləri ilə “PFK” şirkətinin təşkil etdiyi konqres fizika, kimya, elektronika və digər sahələrdə fəaliyyət göstərən alim və mütəxəssisləri bir araya toplayacaq.
Əsas məqsəd nanoelm və nanotexnologiyalar sahəsi üzrə aparılan araşdırmaların təbliği və müxtəlif ölkələrdə çalışan tədqiqatçı, mühəndis və tələbələrin nanotexnologiyalar haqqında elmi biliklərinin artırılmasıdır.
Tədbirdə karbon nanomaterialları, qrafen, nanoborular, nanomaterialların sintezi və səciyyələndirilməsi, nanostrukturlaşdırılmış yarımkeçiricilər, nanoelektronika, optoelektronika, molekulyar elektronika və digər əlaqədar mövzuların müzakirəsi nəzərdə tutulur.
