Son zamanlar Pilotsuz Uçuş Aparatları (PUA) ilə yanaşı onların Yerüstü İdarəetmə Sistemi (YİS) də kiberhücumlara məruz qalır. Buna YİS-ləri hədəf alan müxtəlif növ zərərli proqramları nümunə göstərmək olar. Zərərli proqramların vaxtında aşkarlanmaması isə YİS tərəfindən idarə olunan PUA-ları ciddi təhlükə altına atır.
ETN İnformasiya Texnologiyaları İnstitutunun doktorantı Orxan Vəlixanlının müəllifi olduğu Pilotsuz Uçuş Aparatlarının Yerüstü İdarəetmə Sistemində təsvirlərin analizi əsasında zərərli proqramların aşkarlanması” (Detection of malware in ground control stations of unmanned aerial vehicles based on image processing) adlı məqalədə bu barədə məlumat verilib. Məqalə “Inderscience” nəşriyyatında dərc olunan “International Journal of Information and Computer Security” jurnalında çap olunub.
Məqalədə YİS-ləri hədəf alan müxtəlif növ zərərli proqramların aşkarlanması üçün hibrid yanaşma təklif edilmişdir. Təklif olunan hibrid yanaşma konvalyusiya (bükülmə) neyron şəbəkəsinin bir növü olan ResNet-50 və dayaq vektorları metoduna əsaslanır. Tədqiqatlar zamanı iki müxtəlif mənbədən olan verilənlərdən – “Microsoft” şirkəti tərəfindən yaradılan “BIG 2015” verilənlər bazası və “MalwareBazaar” saytından əldə olunmuş zərərli proqram nümunələrindən istifadə edilmişdir. Aparılmış tədqiqatlar nəticəsində 98,62%-lik aşkarlama dəqiqliyi əldə edilmişdir.
Qeyd edək ki, “International Journal of Information and Computer Security” jurnalı Scopus və Web of Science bazalarında indeksləşir.
© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.
