ETN İnformasiya Texnologiyaları İnstitutunda “Rəqəmsal iqtisadiyyatın müasir infrastrukturunun formalaşmasının texniki-texnoloji problemlərinin tədqiqi və perspektiv istiqamətləri” mövzusunda elmi seminar keçirilib.
Əvvəlcə şöbə müdiri, iqtisad elmlər doktoru, professor Əlövsət Əliyev mövzuya dair çıxış edərək, rəqəmsal iqtisadiyyatın inkişafının müasir cəmiyyətin və dövlətlərin iqtisadi transformasiyasını sürətləndirən əsas amillərdən biri olduğunu vurğulayıb. O, rəqəmsal iqtisadiyyatın infrastrukturunun formalaşmasının süni intellekt, Big Data, 5G, bulud, Əşyaların İnterneti, blokçeyn və digər rəqəmsal texnologiyalarıın effektiv tətbiqindən asılı olduğunu diqqətə çatdırıb, bu istiqamətdə tədqiqatların əhəmiyyətinə toxunub.
Sonra məruzəni təqdim edən institutun böyük elmi işçisi, texnika üzrə fəlsəfə doktoru, dosent Roza Şahverdiyeva rəqəmsal iqtisadiyyatın məqsədinin cəmiyyətin iqtisadi həyatının bütün sahələrində rəqəmsal texnologiyaların sistemli tətbiqini və inkişafını təşkil etmək olduğunu diqqətə çatdırıb.
Mövzunun aktuallığından bəhs edən dos. R.Şahverdiyeva sürətli rəqəmsal transformasiyanın iqtisadiyyatın əsas elementlərinə dərindən nüfuz edərək yeni biznes modelləri, innovativ texnologiyalar və səmərəliliyi artıran sistemlər formalaşdırdığını bildirib. Əlavə edib ki, Sənaye 4.0 texnologiyalarının tətbiqi ilə iqtisadiyyatın müxtəlif sektorlarının rəqəmsallaşdırılması, rəqəmsal inkişaf çərçivəsində rəqəmsal ekosistemin qurulması, innovativ ekosistemin inkişafına dəstək, innovasiya mərkəzlərinin yaradılması, rəqəmsal cəmiyyət üçün rəqəmsal savadlılığın artırılması, dövlət qurumları əməkdaşlarının rəqəmsal bacarıqlarının inkişaf etdirilməsi, rəqəmsal inkişafın idarə olunması, əlaqələndirilməsi və tənzimləmə mexanizmlərinin formalaşdırılması və s. mövzunun aktuallığını şərtləndirir.
Məruzəçi həmçinin rəqəmsal iqtisadiyyatın təşəkkül mərhələləri barədə məlumat verib, rəqəmsal iqtisadiyyatın ən geniş yayılmış növünün e-ticarət olduğunu vurğulayıb. Rəqəmsal iqtisadiyyatın əsas xüsusiyyətləri barədə danışan məruzəçi bildirib ki, bu xüsusiyyətlərə rəqəmsal iqtisadiyyatın formalaşmasının əsas dayaq prinsipləri, əsas komponentləri, hərəkətverici qüvvələri ənənəvi iqtisadiyyatdan fərqləri və üstünlükləri, müasir texniki-texnololoji problemlərinin konseptual həll mexanizmləri, müasir infrastrukturunun formalaşması üzrə beynəlxalq təcrübənin Azərbaycanda tətbiqi məsələləri daxildir.
Dos. R.Şahverdiyeva həmçinin rəqəmsal iqtisadiyyatın infrastrukturunun texniki və texnoloji infrastrukturu barədə məlumat verib. “Milli rəqəmsal iqtisadiyyatın infrastrukturunun formalaşmasının texniki-texnoloji problemlərin həlli innovativ yanaşmaların tətbiqini tələb edir”, - deyə məruzəçi bildirib. O, milli rəqəmsal iqtisadiyyatın inkişafı üçün təkmilləşdirilmiş texnoloji infrastrukturun yaradılması, dövlətin rəqəmsal idarəetməyə keçidi, o cümlədən rəqəmsal təhlükəsizlik sahəsində innovativ həllərin tətbiqinin əsas strateji hədəflərdən olduğunu əlavə edib.
Məruzə ətrafında müzakirələr aparılıb, suallar cavablandırılıb.
Sonra i.e.d., professor Əlövsət Əliyev süni intellekt əsaslı texnoloji iqtisadiyyat, rəqəmsal iqtisadiyyatın müasir infrastrukturunun formalaşması problemləri ilə bağlı fundamental tədqiqatların davam etdirilməsinin zəruriliyini vurğulayıb. Alim bu sahə üzrə elmi tədqiqatların daha da dərinləşdirilməsi, aparılan araşdırmaların nəticələrinin nüfuzlu elmi jurnallarda nəşr olunması üçün təqdim olunan mövzuda yeni məqalələrin tezliklə hazırlanmasına dair tövsiyələr verib.
© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.
