Azərbaycan Respublikası Gənclər və İdman Nazirliyi, Ailə, Qadın və Uşaq Problemləri üzrə Dövlət Komitəsi, ADA Universiteti və Birləşmiş Millətlər Təşkilatının İnkişaf Proqramının birgə təşkilatçılığı ilə keçirilən “Yoxsulluğu yenidən araşdır” Tədqiqat İşi Müsabiqəsinin yekun mükafatlandırma mərasimi baş tutub.
Tədbirdə müsabiqənin nəticələri açıqlanıb və AMEA İnformasiya Texnologiyaları İnstitutunun dissertantı Aysən Fərəcova “Covid-19 pandemiyasının yoxsulluqla mübarizə tədbirlərinə olan mənfi təsirləri” mövzusunda tədqiqat işinə görə 1-ci yerə layiq görülüb.
A.Fərəcova çıxış edərək, Covid-19 pandemiyasından ən çox təsirlənən sahələrin iqtisadiyyat və iş həyatı olduğunu bildirib. Pandemiyanın təsirlərini azaltmaq və onun yayılmasının qarşısını almaq üçün bir çox tədbir və məhdudiyyətlərin yerinə yetirildiyini vurğulayıb. Covid-19 epidemiyası ilə birlikdə dünyada 10% iş itkisi görüldüyünü qeyd edən tədqiqatçı 5 işçidən 4-nün fərqli səbəblərdən və müxtəlif yollarla pandemiyadan təsirləndiyini nəzərə çatdırıb.
Gənc tədqiqatçı təhsilin olmaması, səhiyyə xidmətlərinin əlçatmazlığı, müharibə və siyasi qeyri-sabitlik, demoqrafik amillər, qeyri-sabit əmək bazarları, işsizlik, iqtisadi böhranlar, gəlir bölgüsündə ədalətsizlik, insan hüquqlarının pozulması, ayrı-seçkilik və zəiflik kimi bir çox faktorların yoxsullaşmada rol oynadığını bildirib.
Kənd yerlərində yaşayan və kənd təsərrüfatı ilə məşğul olan insanların da Covid-19 böhranından mənfi təsirləndiyini qeyd edən məruzəçi, yoxsulluğun qarşısının alınması və kənd yerlərində iqtisadi və sosial xidmətlərə çıxışın asanlaşdırılması üçün sistemli, vahid, əhatəli, çevik və yenilikçi siyasətin qurulmasının önəmindən söz açıb.
A.Fərəcova yoxsulluğun nəsillərlə ötürülməsinin qarşısını almaq üçün təhsil siyasətinin funksional şəkildə qurulmasının, təhsilin əlçatanlığının qarşısındakı maneələrin aradan qaldırılması, təhsildə bərabər imkanların təmin edilməsi və təhsil keyfiyyətinin artırılmasının vacibliyini qeyd edib.
© Bütün hüquqlar qorunur. Xəbərlərdən istifadə edərkən www.ict.az saytına istinad zəruridir.
