İlk veb-saytın yaradılmasından 23 il ötür

Bu gün Ümumdünya hörümçək torunun bütün istifadəçiləri üçün mühüm və əlamətdar gündür. Belə ki, 1991-ci il avqustun 6-da ilk veb-sayt meydana çıxıb.

WWW (World Wide Web) layihəsi isə bir qədər əvvəl, 1989-cu ildə yaranmışdı. Nüvə tədqiqatları üzrə Avropa laboratoriyasında fəaliyyət göstərən britaniyalı alim Tim Berners-Li ilk dəfə olaraq ümumdünya kompüter şəbəkəsinin yaradılması haqqında öz təklifləri və ideyalarını nəşr etdirmişdi.

Lakin layihənin geniş şəkildə hazırlanmasına növbəti il, Tim NeXT kompüterinə giriş əldə etdikdən sonra başlanıldı. Yalnız bundan sonra Berners-Li-nin ideyalarının həyata keçməsi real oldu. 1991-ci ildə layihə tamamlandı və CS komitəsinə təqdim olundu. Beləliklə, 23 il əvvəl - 1991-ci il avqustun 6-da ilk veb-sayt meydana gəldi və  WWW səhifələri üçün standart təsdiq olundu.