İnformasiya Texnologiyaları İnstitutunun Elmi şurasının növbəti iclasında şöbə müdiri Şakir Mehdiyev müasir informasiya texnologiyalarının elmi-nəzəri əsaslarının tədqiqi və  inkişaf  etdirilməsi istiqamətində Sənaye 4.0 platformasında kiber-fiziki sistemlərin intellektual analizi  və  sintezi problemləri üzrə aparılan tədqiqatlara dair hesabatı təqdim edib.

Məruzəçi bildirib ki, cari il ərzində bu problem çərçivəsində “Kiber-fiziki sistemlərin dayanıqlığının təmin edilməsi üçün metod və alqoritmlərin işlənməsi”, “Kiber-fiziki sistemlərdə sensor və sensor şəbəkələrinin enerji dayanıqlılığının artırılması üçün metod və alqoritmlərin işlənməsi”, eləcə də “Kritik infrastrukturlu sistemlərin kiberdayanıqlılığının təmin edilməsi üçün metod və alqoritmlərin işlənməsi” mövzuları üzrə araşdırmalar aparılıb, müəyyən nəticələr əldə olunub.

Ş.Mehdiyev şöbədə “Mobil sensor şəbəkələrində etibarlılığın təmin edilməsinin metodları”, “Mobil sensor şəbəkələrində fərdi məlumatların təhlükəsizliyinin təmin olunması problemləri”, “Mobil sensor şəbəkələrinə kiberhucumların monitorinqi” kimi mövzularda da tədqiqatların aparıldığını da diqqətə çatdırıb.

Şöbə müdiri AR Prezidenti yanında Ali Attestasiya Komissiyası tərəfindən tövsiyə olunan beynəlxalq və respublika səviyyəli jurnallarda elmi məqalələrin nəşri, ölkədaxili və beynəlxalq tədbirlərdə iştirak çərçivəsində görülmüş işlər haqqında da məlumat verib.

Sonda AMEA-nın vitse-prezidenti, institutun baş direktoru, akademik Rasim Əliquliyev çıxış edib. Alim şöbədə aparılan elmi tədqiqatların dərinləşdirilməsi, keyfiyyətli məqalələrin hazırlanması və nüfuzlu jurnallarda çap olunmasının vacibliyini qeyd edib, əməkdaşları bu prosesdə fəal iştirak etməyə çağırıb.

© Bütün hüquqlar qorunur. Xəbərlərdən istifadə edərkən www.ict.az saytına istinad zəruridir.