“Kubernetes” (K8s) -  konteynerləşdirilmiş tətbiqlərin idarə edilməsi üçün açıq mənbəli proqram təminatıdır. K8s bu tətbiqlərin klaster mühitində yerləşdirilməsini, miqyaslanmasını və əlaqələndirilməsini avtomatlaşdırır, “Docker” daxil olmaqla əsas konteynerləşdirmə texnologiyalarını dəstəkləyir.

Bu barədə İnformasiya Texnologiyaları İnstitutunun 3 saylı şöbəsinin növbəti onlayn elmi seminarında məlumat verilib.

İnstitutun baş mütəxəssisi Səməd Dursunov “Kubernetes” proqram təminatının işləmə prinsipi” mövzusunda məruzə ilə çıxış edərək “Kubernetes” sisteminin proqramların yerləşdirilməsinin, miqyasının, eləcə də idarə edilməsinin avtomatlaşdırılması məqsədilə istifadə olunduğunu deyib. Onun sözlərinə görə, 2014-cü ildə “Google” tərəfindən ilk versiyası çıxan bu proqram təminatı öz tətbiqləri üçün “Go” proqramlaşdırma dilində hazırlanmışdır.

“Kubernetes”in üstünlüklərindən bəhs edən tədqiqatçı bildirib ki, bunlara xidmətlərin monitorinqi və yükün balanslaşdırılması, saxlama orkestri, avtomatik yerləşdirmə, avtomatik yük paylanması, özünə nəzarət, məxfi məlumatların və konfiqurasiyanın idarə edilməsi və s. aiddir.

Sonra şöbə əməkdaşlarını maraqlandıran suallar cavablandırılıb.

İnstitutun icraçı direktoru, şöbə müdiri, texnika üzrə fəlsəfə doktoru, dosent Rəşid Ələkbərov çıxış edərək mövzunun aktuallığını önə çəkib, tədqiqatların davam etdirilməsi ilə bağlı təklif və tövsiyələrini səsləndirib. Eyni zamanda “Kubernetes” ilə bağlı araşdırmaların dərinləşdirilməsinin, bu proqram təminatından istifadə ilə bağlı beynəlxalq təcrübənin araşdırılmasının vacibliyini vurğulayıb.

© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.