AMEA Milli Azərbaycan Tarixi Muzeyinin lokal kompüter şəbəkəsi yenidən qurularaq, fiber optik kabel vasitəsilə AzScienceNet elm kompüter şəbəkəsinə (EKŞ) qoşulmuşdur. Bununla da muzeyin əməkdaşları AzScienceNet-in imkanları və xidmətlərindən (Eduroam, Cloud Computing, Hosting, e-mail və s.) tam istifadə və yüksəksürətli İnternetə çıxış ilə təmin olunmuşlar. 

AMEA İnformasiya Texnologiyaları İnstitutunun baş mühəndisi, texnika üzrə fəlsəfə doktoru Rəşid Ələkbərovun sözlərinə görə, görülən işlər muzeyin gələcək fəaliyyətinin daha səmərəli təşkilinə, alim və mütəxəssislərinin Avropa elmi mühitinə inteqrasiya olunmasına, dünyanın tanınmış beynəlxalq elmi bazalarından geniş istifadəsinə, o cümlədən muzeyi veb-sayt vasitəsilə virtual olaraq izləməyə imkan yaradacaq. 

Beləliklə, AMEA-nın 31 institut və təşkilatı fiber optik kabel vasitəsilə AzScienceNet şəbəkəsinə qoşularaq genişzolaqlı İnternet istifadəçisinə çevrilmişdir. Yaxın zamanda AMEA Dendrologiya İnstitutunun da bu şəbəkəyə qoşulması planlaşdırılır.

Qeyd edək ki, ilin sonunadək AzScienceNet EKŞ-nin İnternetə çıxış surətinin 300 Mb/san-ə çatdırılması nəzərdə tutulur.

© Bütün hüquqlar qorunur. Xəbərlərdən istifadə edərkən www.ict.az saytına istinad zəruridir.