Əsasən 3D-çap texnologiyaları üzrə ixtisaslaşmış “Sanya Sihai” Çin şirkəti 1770 ABŞ dolları dəyərində olan elektriklə işləyən avtomobil istehsal edib.

dailytechinfo.org saytının məlumatına əsasən, “Tyrant Gold” adlı avtomobilin hazırlanmasına ay yarım, konstruksiya elementlərinin çap prosesinə isə cəmi beş gün sərf olunub. 40 km/saat sürətlə hərəkət edən nəqliyyat vasitəsinin bəzi hissələrində əsasən yüngül və ucuz materialdan istifadə olunub. 3,6 m uzunluğa və 1,63 m enə malik olan avtomobilin çəkisi təxminən 500 kq-dır.

Xatırladaq ki, dünyada üçölçülü çap texnologiyalarının köməyi ilə istehsal edilmiş ilk avtomobil olan “Urbee” 2013-cü ildə Amerikanın “RedEye on Demand” dizayn şirkəti və müxtəlif təyinatlı 3D-printer istehsalçısı olan “Stratsys” tərəfindən hazırlanıb. Ötən il isə “Local Motors” şirkəti “Strati” adlı avtomobil istehsal edib. Bu kimi nəqliyyat vasitələrinin ilkin qiyməti 16 min ABŞ dolları təşkil edir. Bu səbəbdən “Tyrant Gold”u əsl “xalq avtomobili” adlandırmaq olar.