Android-smartfon sahiblərinin əksəriyyətinin fikrincə, olduqları yer haqqında proqramlara və əməliyyat sisteminə informasiyanın ötürülməsini qadağan etməklə təhlükəsizliyi təmin etmək olar. İsrail və Amerika tədqiqatçılarından ibarət qrup qurğunun batareyasının sərf etdiyi enerji barədə məlumatlardan istifadə edərək smartfonun sahibini izləməyə imkan verən metod müəyyənləşdirməklə qeyd olunan üsulla təhlükəsizliyi təmin etməyin mümkün olmadığı qənaətinə gəliblər.

dailytechinfo.org saytının məlumatına görə, məkanın təyini texnologiyası cərəyanın miqdarını yüksək dəqiqliklə ölçür. Sistemin sərf etdiyi enerji ən yaxın mobil stansiyaya qədər olan məsafə, telefon və qüllə arasında maneələrin mövcudluğu və digər amillərdən asılıdır.

Tədqiqatçılar sərf olunan enerjinin miqdarını mobil əlaqə sistemi ilə əldə etməyə imkan verən bir sıra alqoritmlər hazırlayıblar. Bu metod sayəsində “bədniyyətli” proqramın smartfon istifadəçilərinin olduqları yeri izləməsi mümkündür. Proqram üçün yalnız smartfonun sərf etdiyi enerji haqqında məlumatlar və şəbəkəyə giriş imkanı tələb olunur. İzləmə texnologiyasının iş prosesi Android əməliyyat sistemi ilə işləyən Nexus 4 smartfonunda ixtisaslaşdırılmış PowerSpy proqramının köməyi ilə nümayiş etdirilib. Lakin tədqiqatçılar iddia edirlər ki, bu kimi casus proqramlar iOS-u dəstəkləyən iPhone smartfonları üçün də təhlükə törədə bilər.