AMEA İnformasiya Texnologiyaları İnstitutunun baş mütəxəssisi Sabirə Ocaqverdiyeva Rusiyanın Kursk şəhərində institutun həmtəşkilatçılığı ilə keçirilən “Təsvirlərin emalı və obrazların tanınması sistemlərində optoelektron avadanlıq və qurğular – Tanıma-2021” (Оптико-электронные приборы и устройства в системах распознавания образов и обработки изображений – Распознавание-2021) XVI beynəlxalq elmi-texniki konfransında “Veb-kontentlərdə Naive Bayes alqoritmləri əsasında vulqarizmlərin aşkarlanması” mövzusunda məruzə ilə çıxış edib.

Məruzəçi İnternet istifadəçilərinin bir hissəsinin uşaq və yeniyetmələrdən ibarət olduğunu bildirib. Qeyd edib ki, onların İnternet mühitində zərərli informasiyadan qorunması aktual problemlərdən biridir. Son dövrlərdə isə sosial şəbəkələr, forumlar, bloqlar və digər rəy mənbələrində söyüş ifadələri, nifrət, terror, qəddarlıq və s. məzmunlu fikirlərlə zəngin kontentlərin sayı nəzərəçarpacaq dərəcədə artmaqdadır.

“İnternetdə zərərli məzmunla qarşılaşma uşaqların sağlamlığı və psixologiyasına öz mənfi təsirini göstərir. Bu faktorlara əsasən, veb-səhifələrdə olan zərərli məzmunun daha dəqiq müəyyənləşdirilməsi və süzülməsi üçün mətn aşkarlama metodlarının inkişaf etdirilməsinə ehtiyac vardır”, – deyə məruzəçi bildirib.

Onun sözlərinə görə, veb-səhifələrdə olan vulqar danışıq, leksikon (söyüş, jarqon, təhqir və s.) uşaq auditoriyası üçün zərərli məzmun hesab edilir. Onlayn mühitdə uşaq və yeniyetmələrin vulqarizmlərlə qarşılaşması müxtəlif mənfi hallara səbəb olur. Belə ki, uşaqlar psixoloji sarsıntı keçirir, özlərini alçaldılmış hesab edir və ya intihara təşəbbüs göstərirlər.

S. Ocaqverdiyeva maşın təlimi metodlarından istifadə etməklə vulqarizmlərin aşkarlanması istiqamətində yanaşmanı konfrans iştirakçılarına təqdim edib. Tədqiqatçı bu yanaşmanın uşaq və yeniyetmələrin veb-səhifələrdə zərərli məzmundan qorunması, onların İnternet təhlükəsizliyinin təmin olunması və informasiya mədəniyyətinin formalaşmasına köməklik göstərəcəyini vurğulayıb.

© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.