Almaniya istehsalı olan 5 nəfərlik elektrik təyyarəsi “Lilium Jet” ilk sınaq uçuşunu həyata keçirib. Şirkət hələ onlarla sınaq keçirməyi və 2025-ci ildə qurğunu bazara çıxarmağı planlaşdırır.

hightech.fm saytının məlumatına görə, 3 dəqiqə davam edən sınaq uçuşunun videosu yayımlanıb. Bu zaman təyyarə uçuş və eniş edib. Mühəndislər, həmçinin qurğunun döngələrə necə uyğunlaşdığını yoxlayıblar.

Qurğuda 36 propeller istifadə olunur ki, bunların əksəriyyəti ön qanadda yerləşdirilib. Belə sxem təyyarəyə şaquli uçmağa və oturmağa imkan verir.

Şirkət nümayəndələri bildiriblər ki, təyyarə 300 kilometrə qədər məsafəyə uça bilər, onun maksimal sürəti 300 km/saat təşkil edir. Kabina dörd sərnişin və bir pilot üçün nəzərdə tutulub. Sınaqlar 2025-ci ilə qədər davam edəcək. Bundan sonra təyyarələr bir neçə Avropa ölkəsində aerotaksi funksiyasını yerinə yetirməyə başlayacaq.

Təyyarənin növbəti sınaq uçuşları daha yüksək sürətlə reallaşacaq. Mühəndislər 2020-ci ildə 100 km/saat sürətə nail olmaq niyyətindədirlər. “Lilium” sınaqlarının ikinci mərhələsində təyyarənin örtüsü və qanadlarının hansı ağırlığa davam gətirəcəyi yoxlanacaq.

© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.