“Xiaomi” şirkəti ictimaiyyətə yeni “ağıllı” ekranını təqdim edərək, qabaqcıl qadcetlər kataloqunu tamamlamağa davam edir. “Mi AI Touchscreen Speaker Pro 8” bir çox funksiyaya malikdir.

dni24.com saytının məlumatına görə, “ağıllı” ev üçün nəzərdə tutulmuş yeni ekran “Google Nest Hub” və “Amazon Echo Show 8” qurğularına bənzəyəcək. İstifadəçi 8 düymlük ekrana malik qadcet sayəsində real vaxt rejimində hava haqqında məlumat əldə edə, multimedianın ötürülməsi və videoəlaqə funksiyalarından istifadə edə biləcək. İntellektual ekran, həmçinin digər devaysları idarə etmək imkanı verir.

“Mi AI Touchscreen Speaker Pro 8” 10 Vatt gücündə 3 ədəd 50,8 millimetrlik audio-dinamiklə təchiz edilib. O, “Android” və “iOS” əməliyyat sistemləri ilə işləyən qurğulara qoşulur. Qurğu, həmçinin uşaqlara uyğun kontent seçməyə və zəngli saatla xatırlatmaları quraşdırmağa imkan verir. İstifadəçilər ön kameranın köməyilə videozənglər edə və ya qurğudan rəqəmsal fotoçərçivə kimi istifadə edə biləcəklər. “XiaoAI” virtual köməkçisi səsli əmrlərin köməyilə tapşırıqları yerinə yetirir. Alıcı bütün bu funksiyaları dekabrın 18-dən etibarən cəmi 71 ABŞ dollarına əldə edə biləcək.

© Bütün hüquqlar qorunur. Xəbərlərdən istifadə edərkən www.ict.az saytına istinad zəruridir.