1950-ci ildə Alan Türinq kompüterlərin düşündüyünü təyin etmək üçün sadə test təklif edib. Bu test “ağıllı” maşınların sürətli inkişafının başlanğıcı üçün şərait yaradıb.

Məlumdur ki, son illər süni intellekt sistemlərinin daha da inkişaf etməsi faktı ilə daha çox qarşılaşırıq. Yeni əsrin əsas texnoloji yeniliklərindən biri də xəbər mətnlərini yazan kompüter hesab olunur. Hazırda kompüterlər müstəqil olaraq məqalələr yazmaq imkanına malikdirlər.

Süni intellekt proqramı tərəfindən yazılmış ilk xəbər məqaləsi Los Angeles Times saytında yayımlanıb. Kompüter seysmoqraflardan alınan ədədi məlumatlara əsasən Kaliforniyanın Vestvud şəhərində baş verən zəlzələnin xəbərini müstəqil olaraq hazırlaya bilib. Bu texnologiya ABŞ-ın Şimal-Qərb Universitetinin intellektual informasiya laboratoriyasının rəhbəri professor Larri Birnbaumun komandası tərəfindən hazırlanıb. Qeyd edək ki, Birnbaum həm də məşhur mətn generatoru olan Quill sisteminin istehsalçılarından biridir.

interesnosti.com saytının məlumatına əsasən, hazırda süni intellektə sahib olan sistemlər statistik məlumatları və qrafikləri təhlil edərək onları məlumat ümumiləşdirməsinə çevirə bilmək imkanına malikdir. Mətnləri bədii üslubda yazmaq onların növbəti hədəfi hesab olunur.

Avtomatlaşdırılmış ev heyvanları da süni intellekt sahəsindəki yeniliklər sırasına daxildir. Valideynlər obyektiv səbəblərdən övladlarının ev heyvanlarını almalarına icazə vermirlər. Onları təmizləmək, mütəmadi olaraq gəzdirmək, yeməklə təmin etmək vacib şərtlərdəndir. Müasir informasiya texnologiyası canlı heyvanlara alternativ olaraq süni intellektə sahib avtomatlaşdırılmış canlılar yaradıb. Bu sahə həddindən artıq inkişaf edir və demək olar ki, hər həftə yeni patentlər əldə olunur.

Melburn İnstitutunun tədqiqatçısı Jana-Lu Raultun sözlərinə görə, artıq 2025-ci ildə robot ev heyvanları canlılarla ciddi rəqabət aparacaqlar. Rault növbəti onilliklərdə istehsalçıların insanlar ilə yaxın emosional əlaqəyə girə biləcək heyvanlar yarada biləcəkləri fikrini də irəli sürüb.

© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.