Məşhur Sofiya adlı robotun mini-versiyası hazırlanıb. İstehsalçılar kiçik Sofiyanı ənənəvi robotlarda olduğu kimi, bədənlə təchiz ediblər. Onun başı “böyük bacı”sındakı kimi, insan başına bənzəyir və saçları yoxdur. Boynunun arxasında kiçik pəncərə yerləşdirilib ki, onun vasitəsilə də detallar və mexanizmlər görünür. Hündürlüyü cəmi 36 sm olan robot əsl uşağa bənzəyir.

robo-hunter.com saytının məlumatına görə, robot-uşaq hərəkət edə, rəqs hərəkətlərini yerinə yetirə, məkanda səmtini müəyyən edə, sifətləri yadda saxlaya, söhbət edə və hətta gülməli əhvalatlar danışa bilir.

Mini-Sofiya, həmçinin uşaqlara robot texnikası və proqramlaşdırmanı öyrətməyə kömək edəcək. Avtomatlaşdırılmış qurğunun sahibləri onun üçün “Blockly” və “Python” dillərində proqramlar yaza biləcəklər.

“Hanson Robotics” şirkəti 3 gün ərzində “Kickstarter” platformasında Sofiyanın “kiçik bacı”sının kütləvi istehsalı üçün lazım olan məbləğin yarısını toplaya bilib. Kampaniyanın bitməsinə 57 gün qalıb.

Cari ildə satışa çıxarılacaq robotun qiyməti 149 dollar təşkil edəcək.

© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.