Cənubi Koreyanın ən böyük avtomobil istehsalçısı “Hyundai Motor” ekoloji avtomobil nəqliyyatının istehsalını genişləndirmək fikrindədir. Şirkət 2030-cu ilədək hər il hidrogen yanacaq mühərrikli təxminən 500 min avtomobil istehsal etməyi planlaşdırır.

belta.by saytının məlumatına əsasən, şirkət gələcəkdə hidrogen-elektrik mühərriki ilə işləyən (FCEV) minik və ticarət avtomobillərinin istehsalını artırmağı planlaşdırır. “Hyundai motor” hidrogen yanacaq sistemlərinin tətbiqi sferasını genişləndirmək niyyətindədir.

Proqnozlara əsasən, dünyada FCEV mühərriklərinə tələbat 11 il ərzində əhəmiyyətli dərəcədə artacaq. Bu tələbatı ödəmək üçün “Hyundai Motor” perspektivli tədqiqatlara 2030-cu ilə qədər təxminən 6,7 milyard dollar sərmayə qoymağa hazırdır. Hidrogen yanacaq elementləri sistemlərinin istehsalı üzrə ikinci zavodun tikintisi bu istiqamətdə görülən əhəmiyyətli işlərdən biridir. 2022-ci ilə kimi müəssisənin hidrogen mühərriklərinin istehsal həcminin 3 mindən 40 minə qədər artırılması gözlənilir. Hazırda hidrogen yanacaq elementinə perspektivli enerji mənbəyi kimi baxılır. Ekoloji təmiz, tükənməz resursa malik olması hidrogen yanacağının əsas üstünlüklərindəndir.

© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.