Fransa İntellektual Sistemlər və Robot Texnikası İnstitutunun mühəndisi Erik Lekoline robotlaşdırılmış “MobiLimb” barmağının bütün tətbiqi üsullarını nümayiş etdirən videoçarxı dərc edib.

naukatv.ru saytının məlumatına görə, xüsusi hərəkətlər vasitəsilə robot smartfona daxil olan bildirişlər və ya digər informasiya barədə xəbər verir. Qurğu ekranda baş verənləri təkrarlayaraq 4D kino effekti yaradır, smartfonun iş rejimini dəyişir, kağız üzərində şəkil çəkir, fənər funksiyasını yerinə yetirir və hətta istifadəçinin əlini sığallayır. Bundan başqa, barmaq smartfonu düz səth üzərində hərəkətə gətirir və rahat izləmə üçün onu əyir.

“MobiLimb” 5 idarəetmə mühərrikindən istifadə edərək barmağın geniş hərəkət diapazonunu təmin edir. Qurğunu standart qara plastikdən hazırlamaq və ya onu süni dəri ilə örtərək insan barmağına bənzətmək mümkündür.

Layihənin İstifadəçi İnterfeysi Proqram təminatı və Texnologiyası üzrə ACM Simpoziumunda (The ACM Symposium on User Interface Software and Technology – UIST 2018) təqdim olunması planlaşdırılır.

© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.