Çinin “Baidu” şirkəti insan səsini bütün analoqlarından daha yaxşı və sürətli təqlid edən neyron şəbəkəsini təqdim edib. O, zəruri olduqda səsə lazımi aksent və çalarlar əlavə edərək, onu “klonlaşdırır”. Yeni sistemin əsas xüsusiyyəti akustik məlumatları yüksək sürətlə analiz edə bilməsidir.

techcult.ru saytının məlumatına görə, 2017-ci ildə bu sistemin sələfi təqdim edilmişdi. Süni intellektə əsaslanan “Baidu Deep Voice” yeni səsin generasiyası üçün ilk materialın öyrənilməsinə 30 dəqiqə sərf edirdi. “Adobe VoCo” sistemi səsi 20 dəqiqə, Kanada startapı “Lyrebird” 1 dəqiqə, “Baidu”nun yeni texnologiyası isə bir neçə saniyə ərzində təqlid edir.

Bu innovativ texnologiyanın ticarət potensialı olduqca genişdir. Yeni sistemdən sevimli personajın səsi ilə danışan “canlı” elektron köməkçinin, uşağı anasının səsi ilə sakitləşdirən rəqəmsal dayənin və s. yaradılması üçün istifadə etmək olar. O, danışıq qabiliyyətini itirmiş insana ünsiyyət qurmaq imkanı verə bilər.

Lakin bu texnologiyadan məlumatların saxtalaşdırılması və dələduzluq məqsədilə də istifadə edilə bilər. Sifətin və hərəkətlərin klonlaşdırılması və konkret şəxsin “iştirakı” ilə videonun yaradılması artıq mümkündür. Məsələn, biometrik identifikasiya sistemlərindən keçmək üçün görüntüyə səs əlavə etməklə şəxsin optimallaşdırılmış surətini almaq kifayətdir.

© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.