Tez-tez insanlar robot texnikası və incəsənəti birləşdirməyə cəhd edirlər. Bir müddət öncə simfonik orkestr və əfsanəvi tenor Andrea Boçelli ilə bir səhnədə çıxış edən robot-dirijor haqqında məlumat verilmişdi. Bu yaxınlarda isə, bir az əvvəl ilk musiqi albomunu yazan sənaye robotlarının musiqi kollektivi təqdim olunub. Yeni Zelandiya musiqiçisi Naycel Stenfordun yaratdığı qrup “Automatica” adlanır.

hi-news.ru saytının məlumatına görə, Naycel öz studiyasında kompozisiyaları üçün müxtəlif vizuallaşdırmalar yaradaraq səs dalğaları və müxtəlif dinamikalarla tez-tez təcrübələr keçirir və onları “YouTube” kanalında yerləşdirir. Sonra isə o, alman şirkəti “Kuka Roboter”dən üç sənaye robotu alaraq öz yeni “metal dostlarının” köməyi ilə musiqi yaratmağa müvəffəq olub. 

Musiqiçi avtomobillərin quraşdırılması və qaynaq işləri üçün istifadə olunan sənaye robotlarına musiqi alətlərində ifa etməyi öyrətmək üçün uyğun proqram təminatı əldə edib və proqramlaşdırmağı öyrənərək onları öz ehtiyacı üçün uyğunlaşdırmağa müvəffəq olub.. Bu işdə o, “Robot Animator” və “Maya 3D” proqram paketlərindən istifadə edib.

Qeyd edək ki, robotlar fortepiano, barabanlar, bas-gitara, sintezator və “DJ turntable” daxil olmaqla, beş müxtəlif alətdə ifa etməyi öyrəniblər.

© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.