Moskva Elektronika və Riyaziyyat İnstitutunun Milli Tədqiqat Universitetinin texnologiyalar, sistemlər və proseslər sahəsində kosmik tədqiqatlar laboratoriyasının əməkdaşları qoxuların tanınması üçün neyroşəbəkə əsasında süni intellekti tətbiq ediblər. Bu, kimyəvi maddələrin geniş sinfinin qoxusunun tanınması üçün yığcam “elektron burun” qadcetinin patentini almağa imkan verib.

ferra.ru saytının məlumatında bildirilir ki, ideyaya əsasən, “elektron burun” yalnız müxtəlif qaz qarışıqlarını ayırd etməyəcək, həm də yeni qoxuları yadda saxlayacaq. Mütəxəssislər gələcəkdə qurğunun təhlükəsizlik xidmətləri ilə yanaşı, adi vətəndaşlar üçün də yararlı olacağını qeyd ediblər.

Universitetin professoru Vladimir Kulaqin bildirib ki, “elektron burun” qaz qarışıqlarının keyfiyyətli tərkibinin müəyyən edilməsi üçün ölçü cihazıdır. Hazırda çoxlu sayda qaz və qoxu sensorları mövcuddur, lakin onların hamısı yalnız müəyyən bir qoxunun tanınmasına uyğunlaşdırılıb. Yeni qadcet isə universaldır.

Tədqiqatçıların təklif etdiyi qurğu qarışıqların analizi zamanı yüksək dəqiqliyə nail olmağa imkan verir. Bunun sayəsində cihazın işini yeni qoxuları yadda saxlayan və onlarla yenidən qarşılaşdıqda asanlıqla ayırd edən canlıların iybilmə orqanlarının işi ilə müqayisə etmək olar.

© Bütün hüquqlar qorunur. Xəbərlərdən istifadə edərkən www.ict.az saytına istinad zəruridir.